01 | 自己行李自己負責
試過有位女士，一上機，就老奉地叫我去幫佢搬行李…… 我真係唔明白，行李是自己的，自己搬好合理，點解要怪空服員唔幫手呢？
你問我，我絕對會幫一啲老弱、傷殘、孕婦，甚至係唔夠高嘅乘客放行李，但你好人好者，我又何解要幫你托呢？
航空公司係唔會負責搬行李而導致嘅工傷的，如果因為你個行李整親條腰，我真係會連份工都冇埋㗎知冇？
順帶一題，座位上嘅行李櫃位係先到先得，如果閣下好遲先上機，而航班係全滿的話，其實真的未必可有位給你。
當然，空服員會盡力找空位，但請你也不要怪我沒有預先留空位給遲到的你好不好？
貼士：手提行李重量不要超出7kg，如超出的話，可預先要求免費/收費機艙服務。另外，請盡早上機，確保有位擺行李。
02 | Delay是平常事
其實搭慣飛機嘅人都知，delay是如何等閒嘅事啊～ 但就總有啲人好少出國，唔明白 delay 其實真係唔關空姐事⋯⋯ 於是將所有不滿發洩晒落空服員身上，其實很無辜，你知道嗎？我哋比你更加想起飛，然後收工！
03 | 享用屬於自己客艙的飲品、食物
冇錯，商務客艙嘅飲品、飛機餐嘅選擇係多過經濟艙好多，飲品例如有菊花茶、薄荷茶、港式奶茶。
飛機餐就當然好味啲大份啲啦，雪糕都經常會有。
但坐經濟艙的你不要忘記，機票價錢真係差一截㗎嘛～所以，請你 order 番你所屬客艙嘅飲品同食物。
貼士：以國泰為例，經濟客艙亦有不少飲品選擇，例如紅白酒、檸茶檸水、汽水、果汁、中茶西茶、牛奶等等。
04 | 多說謝謝，大家開心
雖然我係土生土長嘅香港人，但老實講，普遍香港人冇禮貌係事實。
我唔想一竹篙打沉成船人，有禮貌嘅香港人唔係冇，但比例上係少啲⋯⋯
其實even大陸啲大媽落機時都會講聲：「謝謝你們，辛苦了。」相反落機時，我很少遇到香港人跟我說謝謝或再見，而且當我跟他們說謝謝再見的時候，很多都是木無表情的 。
貼士： 乘客注意禮貌，其實空服員定必禮尚往來。
05 | 出外旅遊帶支筆
出國要填入境表，這…… 是常識吧！
貼士：你可以問空服員借，但一定要還，因為我還要借給下下下下個乘客，多謝合作。
網民留言：將心比己最重要
其實空姐並不是要求乘客甚麼，但如果大家願意配合，別把空中服務員當成自己個人的服務生的話，乘客簡單的一個動作、一句問候已經讓空姐很窩心了！
講完！我知我知，食得鹹魚抵得渴吖嘛！所以，即使喺飛機內遇上再冇禮貌嘅人，我都會盡量滿足佢哋。因為我尊重自己，好希望每位香港人都會，而唔係剩係識得話大陸人，佢哋差，唔代表我哋要跟。各位服務行業嘅朋友、各位香港人，共勉之啦！
