01| 大學區買妝物 爆拎Samples服務又好
好多人都會去明洞買妝物，貪舖頭夠集中勁方便，而且店員多數識講普通話，唔怕溝通唔到！不過近年多咗大陸客爆買，店員見有大生意，當然要冷落香港人，是但招呼就算，甚至黑面真係令人嬲嬲地！其實A君一向唔去明洞，買妝物多數會去大學區（弘大、梨大、建大等），仲一定要行入啲，唔去地鐵站附近的舖頭，事關員工勁Nice有問必答，而且即使買一支兩支，都唔會黑面仲俾勁多Samples，A君試過齋買一支洗面乳就收到成10包Samples，勁誇張！所以話，買妝物一定要行大學區，有時仲會有Discount添呀！
02| 東大門買衫 行得愈入愈有機
想買平衫，好多人都會去東大門，不過A君同大家講，其實並唔平！講真，好多遊客都剩係行hellp APM、doota等近地鐵站的商場，呢類商場主攻遊客生意，買衫係海鮮價，但其實已經mark up 30%-40%！想買平衫就一定要行入啲，去DDP旁邊真正的批發市場，啲衫真係超級平，不過最麻煩係要批發，又要厚面皮同老闆講數，同一款又要買幾件先肯做生意，實在有啲麻煩！推介同4-5個朋友仔一齊去，又或者係Hostel搵到新同伴再去，咁樣講價買衫比較容易呀！
03| 高速巴士站地下街 買衫平弘大一半
唔想同東大門老闆講數，好多人都會去弘大、梨大買衫，以為成街都₩10,000衫已經好抵？錯！原來去行高速巴士客運的站地下街，會搵到再平啲！A君親身中過伏，試個在弘大買咗件₩25,000的外套，去到地下街發現同款同色，竟然只係₩10,000，平咗一半有多，真係好心痛呀！個人最推介Goto Mall（高速巴士站地下街），地點唔算遠但有約600間店舖，購物狂真係買足一日都唔夠喉，想掃平貨必去！
04| 首爾掃貨 用銀聯有著數
相信大家都知去百年/明洞換錢最抵，但銀聯卡其實都唔差！A君多數在香港換定少少錢跟身，去到首爾再睇情況用銀聯卡撳錢，咁就唔怕走個日用唔晒啲錢！另外A君就試過成功用銀聯卡當EPS過數買嘢，平過錄卡又勁方便呀！最重要係，好多舖頭、免稅店等用銀聯卡俾錢仲有額外優惠，即買即扣好抵，就連T-Money增值都有得減手續費，所以去首爾旅行，銀聯卡真係一定要跟身！
