銀聯提款卡不能撳ATM換臺幣 - 建議的應對方法

最近編輯都在網上見到，有去了台灣的朋友指，在機場甚至出返出面市區有部份的櫃員機(ATM)用唔到銀聯提款卡撳錢換臺幣出嚟駛，係講緊開通左海外提款、戶口有錢、用有銀聯Logo嘅ATM提款嘅情況下提唔到款……至於點解會撳唔到，編輯聽過的原因有很多，例如銀行ATM Software Update、中華民國政府限制銀聯每日提款額度等等。但今日編輯不打算去探究其原因，主要想就呢個大問題俾少少建議大家，令大家唔會因為無臺幣而流落台灣街頭。

事前準備功夫要做足

以下呢幾樣嘢，編輯想你地確保已經準備好：

(A) 有一至兩張已經開通海外提款功能、有銀聯標誌、卡內戶口有錢的提款卡
(最好唔係銀聯信用卡，因為好易當左現金透支)

最好張卡得一個戶口，因為多過一個戶口ATM分唔到你想提邊個戶口嘅錢，試過有網友因為往來/支票戶口係主戶口而又咁啱無錢提唔到款，要從儲蓄戶口過返錢去先撳到錢
亦可以帶張PLUS/Cirrus提款卡，或者有連結銀行儲蓄戶口的VISA/MasterCard信用卡(下面會補充)

(B) 你係肯定用緊有銀聯Logo的ATM提款(機場嘅ATM多數都支援到銀聯)
(C) 少量港幣 – 既然你搭車去機場都要錢，咁帶定少少港幣喺身，你亦不至於無錢而流落街頭。

當無法使用銀聯卡提款時，4 種應對方法

01 | 點都喺機場試一試－－用你張銀聯提款卡喺機場ATM提款

其實有朋友同小編講話喺機場撳到，因此先唔好放棄嘗試喺機場提款，機場即使一部唔得都可以再試另一部。至於點解叫大家帶多一張提款卡？係因為你一張唔得都至少可以拎第二張出嚟試嘛。
如果你撳到台幣咁就當然無問題啦，但係如果你試過唔得、未出發已經擔心ATM用唔到，抑或你趕時間唔能夠逐部試(e.g.約咗包車司機)，咁就可能要諗諗下面嘅方法……

02 | 面對以下 2 種情況，編輯給的建議：

有少量台幣在身：如果你有用剩台幣(Around NT$1000-2000或以上)，你可以用住手上嘅台幣應付搭車、買電話卡等開支，然後出返去市區先再試ATM
沒有台幣在身：如果你一個仙台幣都無，只有少量港幣喺身，你可以出發前喺香港中環百年、尖沙咀堅成、沙田生生或者深水埗發達鳥找換店(盡量唔好喺香港銀行或者是但一間找換店換，因為匯率可以好唔靚仔)，又或者去到台灣嗰邊機場嘅台灣銀行或者兆豐銀行(台中機場只有台銀)兌少量港幣做台幣應付搭車出市區、買電話卡等開支，然後出到市區再試ATM

香港嘅 4 個途徑基本上唔會收手續費，而機場台灣銀行/兆豐銀行會收返每筆交易NT$30嘅手續費(市區分行無手續費)；但係百年、堅成、發達鳥禮拜日假期唔開的，另外台銀同兆豐如果換舊鈔票會加收手續費。

台灣銀行：如果兌換2010年之前發行的港幣舊鈔成台幣，每張會加收NT$50手續費。
兆豐銀行：如果匯豐兌換2000/2002年版的1000蚊紙，或者換中銀2003年版的1000蚊紙成台幣，每張會加收NT$100手續費。

(以4/6匯率為準，只供參考)
百年：1HKD=4.05TWD
堅成：1HKD=4.049TWD
生生：1HKD=4.065TWD
發達鳥：1HKD=4.03TWD
台灣銀行：1HKD=4.031TWD
兆豐銀行：1HKD=4.045TWD

至於出到外面有邊啲地方有ATM？

基本上捷運站、火車站/臺鐵站(大站如台北、台中等都會有的)、高鐵站、便利店/超商、市區銀行門口、郵局、百貨公司/商場等都會搵到；而根據網友們報料，7-11內嘅ATM、國泰世華ATM以及中華郵政ATM成功撳錢嘅比率較高。

03 | 如果大家出到出面再試ATM試左好幾次都唔得⋯⋯

暫時編輯收到嘅多數出到去撳都無問題，但係當然要有最壞打算。當你手上臺幣可能最多頂到兩日的話，你除了可以繼續試ATM外，若然你仲有港幣在身，亦都可以考慮喺市區嘅銀行再兌換少量台幣；不過市區銀行只開平日而且都收得早(通常開9:00-15:30)，所以大家要諗一諗。

至於有人會去郵局換台幣，但一來郵局個Rate唔係特別靚仔，二來郵局同樣只開一至五，所以就可免則免了；如果喺百貨公司換，你懂的，匯率更加差。

(以4/6匯率為準，只供參考)
彰化銀行：1HKD=4.131TWD
國泰世華：1HKD=4.102TWD

第一銀行：1HKD=4.092TWD
玉山銀行：1HKD=4.122TWD
台新銀行：1HKD=4.1167TWD

04 | 如果大家有帶VISA PLUS/MasterCard Cirrus提款卡去台灣

或者有一張連接住你銀行儲蓄戶口(或者支票戶口)的VISA/MasterCard，你都可以使用有PLUS/Cirrus標誌的ATM提款換臺幣(機場ATM多數都支援到PLUS/Cirrus)。

PLUS嘅匯率係跟VISA提供的匯率變返港幣扣帳，而Cirrus會跟Master提供台幣兌美金嘅匯率先化做美金，然後再跟你銀行嘅匯率變返港幣扣帳，同時銀行會收埋每次提款嘅手續費，每間銀行嘅做法雖然唔同，但部份銀行嘅手續費係會貴過銀聯或者喺台灣當地銀行換所需嘅手續費(e.g.匯豐每次$40，東亞每次$50；恒生PLUS/Cirrus/銀聯一樣每次$20)，所以大家要睇睇要抵定要左錢先。

同樣請記得先開通海外提款功能，同埋揀返用PLUS/Cirrus提款，如果唔係好易會變左當你現金透支(現金透支手續費會再貴啲)。雖然扣返手續費嚟講個Rate可能低過銀聯，但呢個都係銀聯撳唔到錢嘅情況下一個可以考慮嘅方法。

(以4/6匯率為準，只供參考)
VISA/PLUS：1HKD=4.153TWD
MasterCard(美金)：1USD=32.319TWD