既然辣着咗個火頭，我都唔介意順便講埋，我知！你哋班人嫁咗俾個行李櫃嘛！「我㗎！個行李櫃！點解會有人擺咗啲行李喺度？」港女A望住個行李櫃對住我講。
原文獲貪玩空少安德魯授權刊登於GOtrip，請勿隨意轉載。
自己冇位擺行李，港女：「公平咩？」
當然我好有禮貌咁同佢講：「小姐，唔好意思呀，因為對面位乘客有太多行李放咗喺度，前面行李櫃亦都有位置，小姐你不妨都可以將你嘅行李放喺前面個行李櫃。」
港女：A一臉不屑：「吓！咁公平咩？」公平？你同我講公平？
當你哋用你哋嘅行李打爆咗個行李櫃嘅時候，你對其他乘客公平咩？
當明明上機嘅行李只係7kg，但你攞上嚟嘅行李仲重過20kg，仲要望住我哋啲crew叫我哋攞嘅時候，公平咩？
當你坐1個位，但霸晒成格行李櫃，其他客只可以搵其他客嘅位放嘅時候，公平咩？
不如咁啦，我將個行李櫃刻上你個名，好唔好？於是我完美咁笑一笑之後，我就走開兼反咗下白眼。
個個乘客都想要私人 locker！
行咗幾步，麻煩港男又截停咗我。「點解我個行李櫃裝滿嘢呀？個行李櫃我架！」知啦，你又嫁咗俾個行李櫃嘛！見到你手攞住幾大袋戰利品嘅時候，我只可以講句：「先生，我幫你搵個位放！」然後報以微笑，但係原來你唔受。
「唔使啦！少少嘢都做唔到！」
嘩！依家我係咪殺咗你祖宗十八代？使唔使啤到我實一實呀？你都係冇自己1個私人locker啫，乜機票上寫明你有個私人locker咩？
解決方法：一係早啲上機，一係搭私人飛機啦
其實你咁有氣派，你應該搭私人飛機嘛！咁你咪可以嫁俾個 locker 囉！你哋咁鍾意嫁俾個 locker，點解唔一早上機，霸定你哋個終身伴侶 locker 呢？真係唔明你哋啲老公、男朋友、老婆、女朋友點忍你。唔知係咪咁啱咁橋，通常呢啲事，硬係係香港人。
