撰文：Xela | 圖片：新傳媒資料室
去旅行當然要用盡每1分鐘，搭凌晨機到埗立刻出發去玩先符合經濟原則！不過要知道，影相自拍打卡亦是重要環節，落機後睡眼惺忪、油光滿面又點見人呢？空姐不嬲最叻把握停留外站時間觀光shopping食好西，即使long haul機程做足16個鐘，上載Ig嘅相依然神采飛揚，究竟有咩機艙護膚秘訣？
01｜想瞓個靚覺 香薰油放鬆心情
搭凌晨機，好多人都因為太開心精神亢奮，或者瞓唔慣「生暴櫈」，最後眼光光望天光，落機自然殘到爆，唔夠精神落機即刻去玩！
空姐Xela教路，好多crew都必備1支香薰油傍身，長途機休息時間用來輕輕按摩太陽穴，放鬆心情快速入睡。
值得留意的是，含粉紅葡萄柚及杜松籽的香薰精油反而有提神效果，千祈咪買錯！
02 | 保濕緊要 但都唔及防曬重要
搭夜機去歐洲不少人鍾意素顏上機，方便機程途中可以敷mask保濕或清爽安眠。即使安坐機艙室內，高空環境紫外線仍然超強勁，容易加速皮膚老化使皺紋現形！
所以上機前，空姐都一定會做足防曬準備，搭夜機都要！
記得起飛前30分鐘就要搽防曬乳，咁先有效果。建議選擇SPF 50及PA+++的防曬乳，而且質地要夠潤，咁先可以在對抗紫外線的同時，保持肌膚水潤有光澤！
03 | 煲劇會眼倦 迷你按摩器去浮腫
好精神瞓唔着點算？好多乘客會善用機上時間睇戲煲劇，但長期注視螢幕會令眼睛疲倦及乾燥，眼睛缺水變得又乾又腫，影相就唔靚！
空姐建議隨身帶備迷你按摩器，落機前1個鐘塗上眼部精華液，再輕輕按摩打圈15分鐘，blink blink眼立即返嚟。
不過Xela話平時on duty忙到落機最後1秒，冇時間搞對眼，自己旅行時必定唔理其他空姐目光，仲會推介其他空姐下次放假試下！
04 | 弊傢伙帶漏嘢！ inflight sale有急救品
Xela遇過不下1次長途機乘客塊面乾到裂但又冇帶護膚品，走嚟問有冇急救辦法，其實空姐出勤時用化妝品補妝較多，spare保濕產品未必有。
呢個時候Xela會好軟性咁話俾客知inflight sale有幾支products可以急救番，例如國泰有Jurlique玫瑰衡膚花卉水可以保濕（仲要比香港零售價平）。
另有套AROMATHERAPY ASSOCIATES機艙護理套裝係空姐們的心水，Xela話當然唔可以hard sell，會叫佢睇機上雜誌揀番啱嘅產品。
