01 | 先敲門確認房間冇人
我知道好多人好多同事都會入房前意思意思地敲門三下，背後意義你懂的。我都會敲門，但我要確認嘅，係間房冇人！
做過酒店／常入住酒店嘅都會知道，double room 並唔係罕見意外，有次去泰國，同事一開門就大叫，咁好彩幾個 juniors 住附近幾間房，即刻問佢發生咩事，佢話房入面好亂，仲話見到有對男人鞋！同酒店職員講，先知佢哋搞錯咗房間！
02 | 即刻掛請勿打擾牌
呢個係空姐比較常做嘅事，去到一啲 lock and seal 嘅 outport，全日喺房煲劇、足不出戶，你當然唔會想你睇韓劇睇到喊晒口時，清潔姐姐衝入嚟打掃……真係好掃興㗎嘛！
就算有時會外出，我都會掛個牌出去，特別係某啲東南亞國家如印尼等，因為有同事試過冇掛牌出去玩，返到房就唔見咗部 iPad！同酒店講，酒店竟然怪我同事唔將貴重物品放入保險箱！
03 | 關好門窗，安全鎖都要鎖埋
入到房，我會用防盜眼望下走廊有冇可疑人物（有一次就係咁，睇到機長帶住個女人入房，哈哈哈）。
我哋成日一堆制服人喺 lobby，其實係幾惹人注目。平時自己去旅行，特別係自己一個女仔去旅行，出入都最好留意下身邊！
至於要鎖埋安全鎖係因為房卡係電卡嘅，太兒戲唔安全，仲要有頭先同大家講嘅 double room 意外，都係鎖埋好啲！
04 | 熱水壺唔好飲第一轉
詳情原因可以睇番我之前寫落嘅文章( 編按，慎入：「決戰酒店熱水壺的最高境界」)！簡單一講，就係你唔知原來有人會用熱水壺嚟浸絲襪，仲有強國人會用嚟……
有興趣去睇番篇文啦！第一轉煲滾嘅熱水倒廁所，諗落的確係好浪費，所以我會倒喺浴缸，順便消毒！
05 | 睇清楚！邊啲小食要錢
唔好講笑，我試過攞咗要畀錢嘅soft drink嚟飲，而當時我一直以為是免費的！某啲酒店有時會額外送嘢食、飲品畀crew，有次聽個同事講話，間酒店有送汽水畀我哋！
咁我咪以為是但一罐都係free der～結果當然不是了！checkout 時只可以乖乖畀錢！
06 | 記得帶定個人用品，如牙刷毛巾
如果去外國嘅話，最好帶定私家牙刷同毛巾，因為通常都冇嘅！就算有，都奉勸大家盡量用私家毛巾，因為真係好污糟！（詳情可以睇番：酒店房4樣設備的暗黑傳聞）。
呢個周末同屋企人去波士頓玩，點知屋企人竟然唔記得帶牙刷！嗰陣喺偏遠地區，返到酒店又已經好夜，大家估下佢用咩嚟刷牙？
07 | 多拍照，之後出事都有證據
（編按：除了 blogger 以上 6 項，編輯還有以下一點想溫馨提示大家！）
早前有港人入住韓國酒店時，checkout 後收到酒店通知指他弄壞了酒店房門，然後在沒有通知住客的情況下，從他的信用卡扣除了HK$2,088作賠償！（詳情：韓國明洞酒店冤枉住客？｜聲稱木門被弄壞賠 300,000KRW！）不想 checkout 後發生以上事件，入房後馬上拍下照片是其中一個好方法，當然沒有可能把房間每一個角落都拍下，但出事時可能就剛好被你拍下入住前的狀況！