N年前去山形藏王看樹冰，處處遊客迫滿人，轉足幾程纜車流足幾行鼻涕仆足幾次街，終於上到山頂，滿心以為可以睇到藍天白雪絕景樹冰，點知刮起大風雪，一眼望出去，能見度唔知有冇1米，一場來到冇理由空手而回，夾硬步出室外，行唔到去地藏菩薩位就要折返，差點以為自己會死在山頂，掃興而回。近年原來被遊客攻陷山形藏王樹冰已out，唔少識途老馬都轉咗場睇 秋田阿仁樹冰 ！無論藍天銀白大地、黑夜滿天星光，當地日夜景樹冰都超級靚！
看 秋田阿仁樹冰 的交通唔算複雜，一雞兩味順便坐埋觀光鐵道秋田內陸縱貫線，呢條線由角館開始，全長94.2公里共29個站，龍友最迷的在比立內駅為小火車打龍，由於火車班次唔多，想日歸去埋睇樹冰就留意番時刻表。樹冰就在阿仁滑雪場山頂，不過出咗火車站冇車直到滑雪場，建議先預約好周遊計程車在「阿仁合」站，從車站出發大約廿分鐘就到達。
睇雪冰，唔係上雪山就睇到，樹冰出現要配合天時地利：
- 耐寒性強的常綠針葉樹木
- 積雪量須有2-3公尺，降雪量不能太多也不能太少
- 風向穩定，負五度以下的風
在日本只有東北地區藏王、森吉山、八甲田山、八幡平等山區才能看到。
秋田阿仁樹冰 就在森吉山頂，花廿分鐘坐完全長3,473公尺登山纜車到達山頂站（山麓駅），你可以選擇自己隨意走走，又或跟著收費的樹冰案內人（導覽員）走一圈，半小時的樹冰行程，導覽員會解說秋田阿仁樹冰的形成過程，還會帶大家去招牌打龍位影餐飽！去睇雪冰，好大風好凍，一定要做好禦寒準備，見過唔少人著錯鞋差點仆死。大家如果冇帶雪靴，最好換上免費提供的雨靴（對襪一定要夠厚夠暖）。日頭影完，唔夠喉，不妨參加埋夜之樹冰觀賞會，坐雪車上到山頂，睇埋滿布星星的夜空，驚訝這無光害的世界，夜空原來可以有咁多星星咁靚！
夜之樹冰觀賞會
舉行日期：2月10-12、17-19、24-26日及3月3-5日
集合地點：山麓駅
集合時間：6:00pm-8:00pm
參加人數：5-15人
收費：成人2,500円、小童1,500円 （附熱飲）
森吉山阿仁滑雪場
地址：秋田縣阿仁鍵ノ滝79-5
電話：+81-(0)186-82-3311
纜車票價及運行時間：8:30am-4:00pm，成人單程1,200円、來回1,800円
交通：秋田內陸線「阿仁合」站轉乘預約周遊計程車，車資每位1,100円（兩人以上 每位900円)
網址：www.aniski.jp
備註：2017年樹冰觀賞時期由即日至3月5日
