攝影&採訪：成長。足跡 → Round The World
相關文章 ： 永利皇宮 8 月開幕 | 7 大酒店設施率先睇
作為一個窮遊平台，就梗係先帶大家看看它的Palace Room （最平那種） 。
一入房已經有好大嘅空間，睇得出裝修設計的確花咗好多心思，又唔怕太過花巧（兩牆燈中間嗰塊鏡除外，怪怪哋唔知點咁，可能係我唔識欣賞吧）。講起鏡，剩係呢個範圍已經有好多塊鏡，真係點照都冇問題啦！
門口旁有touch panel，一睇就明，簡單易用，臨出門撳兩嘢，熄燈執房話咁易。
衣帽間在浴室外，有熨斗、燙衫板、行李架、擦鞋用品、遮、額外的枕頭和毛氈等等。覺得未夠齊？打去room service幫到你。
浴室堅大，鏡中間有電視。比較少見嘅係浴室都有張櫈，女士們可以坐低慢慢化妝set頭冇難度。浴缸夠大夠深，瞓得好舒服，水喉出水夠快，一陣就滿晒。
Amenities夠晒齊全，其中牙刷、梳、剃鬚刀設計特別，絕對唔會有想用完即棄的感覺。
Molton Brown出品，對我嚟講同其他酒店用嘅分別不大，都係透明gel一支。不過呢隻就有好香嘅椰子味，似太陽油嗰隻，鍾唔鍾意就見仁見智啦！
廁所板有發熱功能，冬天坐低都唔怕凍冰冰！
客房面積
再向入行，間房堅係大喎！同官網啲相比都足8至9成啦！裝修簡單得嚟又好舒服。
床上有兩個好長的枕頭，一個軟啲一個梗啲。個人覺得梗啲嗰個比較好瞓。不過有樣嘢唔好，就係窗塊落地玻璃同塊鏡冇分別－－想睇出面夜景，真係要熄晒燈先睇到，一係就要企到好埋個窗度。
相關文章：澳門訂房前必讀！路氹 19 間酒店房價全攻略
Mini bar大把選擇，夜晚突然肚餓都冇有怕。但要注意嘅係，如果你攞起咗件嘢60秒，佢個system就會自動收你錢！當然，如果你冇食到的話，checkout時講番都冇問題，但嘥晒啲時間就無謂啦！
充電設備收納得宜
兩邊床頭都叉得電 （唔用可以撳低收埋佢，收納得好好），方便瞓覺前叉住電玩下手機，仲有部touch panel，畀你控制晒間房嘅所有嘢，真係勁方便（但其實要搵邊個掣開/熄邊啲燈都幾煩下）。
書枱都有個好似床頭嗰個咁嘅叉電，呢個仲可以用藍牙connect電視 。順帶一提，最抵讚係書枱右邊櫃桶內有差電線，Android同iPhone都有，執漏咗都唔使驚！
總評：客房有驚喜
總括嚟講，客房係畀到我驚喜，夠大又舒服，燈光溫度窗簾易控制，揚聲器勁播歌方便，浴室又大又靚，但如果可以清楚啲睇埋出面個夜景會仲開心，咁睇真係同塊鏡冇分別。不過老老實實，除咗對表演湖嗰邊之外，其他位置都冇咩景睇，一邊對機場，一邊對空地，一邊對山。
壓軸：噴泉景早餐buffet！
瞓醒覺不妨落去Café Fontana試下個早餐buffet，有好多唔同甜品供應，牛角包、muffin、蛋糕通通都好好食（如果你唔怕晨早流流咁heavy的話）。同埋間餐廳對出就係表演湖，坐邊個位都可以望到出面噴水。提提你，表演湖早上10點先開始，想食住早餐睇噴水，記得就啱時間去搵個靚位啦！