text： sammi | photo： 綠茶卷蛋極光 – The adventures of Lina （原文刊登於916期《新假期周刊》）
上年10月，Lina飛到阿拉斯加，仲意外遇上級數最高的白色極光，攝下這張猶如綠茶卷蛋的極光相片，因而奪得西班牙新聞及旅遊資訊組織Spain Buddy的「最佳旅遊攝影作品」獎。
Lina在科技公司工作，經常飛美國、德國、日本開會，計埋公幹平均每月離港2、3次，一有時間就會尋找當地靚景打龍去，攝影年資8年，最近1年主力影極光。
請3放10 1年內5趟極光之旅
有留意Lina的facebook，也會好奇為何好似唔使返工咁密密飛？其實Lina同普通打工仔一樣，1年只有15日年假，但她卻懂得如何利用「請3放10」自製長假期飛long haul；有些月份冇公眾假期的話，Lina會揀星期五晚放工即飛，然後星期三、四早機到港直接返工！
計埋business trip，Lina 1年平均隔三數星期就起飛，5年來差不多飛盡五大洲！去年，看新聞得知2016年後太陽活動周期會轉弱，她更瘋狂地自製追極光之旅。「再唔去，就要等11年先見到如此豐富的極光。」
2016年Lina將旅行大計集中在極光，由去年4月至今330多日內，去過丹麥法羅群島、阿拉斯加、塔斯曼尼亞、挪威，即將3月尾又再飛俄羅斯！Lina解說：「看過1次極光便上癮，每次一落機就衝去影相，次次影到朝早天光，望着極光在頭頂上飛舞，幾攰都精神晒！」
不少專程去看極光的遊客，留足十幾天都未必見到一絲綠光，但Lina卻異常幸運，每個trip 9成時間都能親眼看見，而且是有白有紫有綠的暴風級別！不過，要睇極光的確要付出。「為求用盡時間睇極光，朝早瞓覺，下晝起身食嘢搵景，夜晚直落影到凌晨5、6點，日日如是，還要抵冷在戶外捕捉影像，才儲到如此多極光靚相。」
| 330日追捕極光行程 | |
| 2016年4月 | 挪威：Tromso |
| 2016年4月 | 丹麥：法羅群島 |
| 2016年9月 | 挪威：Lofoten |
| 2016年10月 | 美國：阿拉斯加 |
| 2017年2月 | 澳洲：塔斯曼尼亞 |
| 2017年3月 | 俄羅斯：Murmansk |
極光奇遇衝埋身 睇100次都唔厭
回想2012年第1次睇極光，Lina在加拿大Yukon的Whitehorse參加當地旅行團，可惜多雲。「只見到個天綠綠哋咁囉。」未能圓夢。翌年她到了冰島自駕遊。「頭兩日落機撞正大風雪，以為會與極光無緣，點知兩日後停雪，個天仲變得好清，其後6晚都見到4、5級的極光。
「有晚揸車經過民居，離遠見到極光距離好近，仲見到佢好似向我們的方向飛埋嚟，我即刻攬住部相機衝落車跑出去，點知我衝到埋去，極光就轉彎飛上天！」這個經歷令她異常難忘，尤其是一班朋友衝落車那種莫名的興奮。
去年Lina自製的極光年，第1擊在「極光之都」挪威Tromso都有奇遇。「好幾晚都撞正極光風暴，極光達5、6級，抬頭望上天空見到或紫或白的極光在飛舞，形狀仲好似花灑咁灑落嚟，用言語好難形容那種震撼。」
這次行程，極光不單止不斷變色，還顯示多種形態，想像力豐富的Lina，拍過極光女神、猶如雙彩虹橋的Double Aurora。「不過最令我難忘的，是有晚見到白色極光，仲聽到好似炸油炸鬼般的微弱吱吱聲音，邊有諗過會咁好彩，連極光聲都聽埋？」
罕見粉紅南極光 影盡銀河星雲
及後Lina去更偏門的極光景點，到過丹麥法羅群島及挪威Lofoten都有靚相收穫，直至10月前往阿拉斯加，攝下攞獎的「綠茶卷蛋極光」，Lina決定不再一路向北，南下影南極光。
今年2月，她在澳洲塔斯曼尼亞拍攝了與北極光截然不同的粉紅、黃綠色的南極光。「塔斯曼尼亞的極光雖然弱，看不清跳動及形態萬變的極光，但顏色的層次卻很迷人。」極光微弱的好處，就是可以同時攝下銀河及星雲。Lina雀躍分享集極光、銀河和星雲的相片說：「一次過用肉眼睇晒多種天文奇觀，是南半球獨有的極光景色。」
俄羅斯7級極光 導遊都睇到唔捨得走
跟Lina的訪問在她3月底出發往俄羅斯前進行，但旅途中Lina還給我發最新的俄羅斯極光照片！因語言問題及路況複雜，Lina搵導遊帶路去追極光，Lina睇天氣圖，見到那裏天氣清，就叫導遊帶路。夜晚9點左右到達目的地，晚上室外氣溫約零下15度，不消30分鐘，7級極光突然出現，好似花灑咁灑落嚟嘅感覺，加上俄羅斯萬里無人、無雲、無樹，極光環迴360度圍住你跳動，又是震撼嘅1次。
影到3點鐘，相機冇晒電，Lina要求導遊打道回府，但導遊竟唔捨得走，因為佢話廿幾歲人，只係第4次見到級數咁高咁靚嘅極光，話Lina真係極之幸運。
幸運不止在極光 大峽谷絕景行
跟Lina談旅行，極光只是她多年行程的一小部分。最近在農曆新年檔期，她無心插柳幸運抽到美國亞利桑那州波浪谷（The Wave）的入場券。「那個國家公園每日只有20人能夠進場，有好多人抽咗幾年都抽唔到！」得知後，她即時約朋友計劃美國之旅，去勻波浪谷、羚羊峽谷、猶他州的天生橋、馬蹄灣等睇峽谷奇景。
「當日同朋友去到波浪谷，因為早去，所以全場得我哋5個人，好似包場咁，好正！」加上1月是當地旅遊淡季，即使在羚羊峽谷也杳無人煙。「淡季去人煙少，唔使同人迫，可以慢慢影相，而且個天特別清，有利夜晚影星空峽谷照。」
愛上攝影後 瘋狂出trip變得有原動力
以為成日出國好開心？過去17年工作裏，頭10年走遍中國大陸，北京、上海以外，還要到偏遠地區開會。「唯一遺憾，當時仲未開始影相，錯失了拍攝中國各省風俗的機會。」每年有一半以上的時間也不在香港，令Lina覺得身心俱疲，但自從2009年學習影相，她漸漸迷上了拍攝風景。「橫掂每次出差也有空餘時間，不如試下去影相？」
從此，出差不再疲累，數數過去5年就到過印尼、新疆、西藏、奧地利、德國、土耳其、摩洛哥及毛里裘斯，近幾年多跑美國、日本及歐洲，就算得1日空閒都會趕去影風景相，就如最近Lina在網上分享的「紅富士」湖中倒影相片和Timelapse影片。
打工仔，只要有逐夢的熱情，15日大假也可以很滿足。