杜拜最新最大 樂園 | Marvel園區快過迪士尼

得我一個喪遊杜拜如何過？梗係去剛剛開業的IMG Worlds of Adventure遊樂場啦！呢個主題 樂園 貫徹中東油王國的精髓 – 要做世界之最！佢係全球最大室內 樂園 ，足足150萬呎，即係28個足球場咁大，未玩已經行到腳仔軟。 樂園 設有中東最快過山車The Velociraptor，起動由0至97km/h只需3秒，直迫法拉利、林保堅尼！驚喜位仲有Marvel超級英雄園區，快過香港迪士尼喎！有兩個復仇者聯盟機動遊戲，變形俠醫、蜘蛛俠及雷神分別有3D電影、過山車及揈到死洗衣機，唔怕玩到反胃就去埋鐵甲奇俠餐廳Tony’s Skydeck鋸扒，身為Marvel迷的我表示期待！另外亦有Cartoon Network及恐龍主題園區，總共21個機動遊戲、28間餐廳食肆及25間商店。邊個夠佢勁？