明洞酒店 5大罪狀
01 | 難搭車！去邊都唔方便！
講真！好多人都以為明洞喺市中心，所以去其他地方都好方便！完全錯誤！雖然首爾地鐵四通八達，但由明洞出發，去弘大、新村、梨大、安國、江南、狎鷗亭、光化門等熱門景點，全部都一定要轉車！
（編按：不過，亦有不少明洞的酒店位置靠近 2號線「乙支路入口」，從這一區的酒店步行至地鐵 2號線大概 10分鐘，可以避免轉車的麻煩。）
要知道首爾搭地鐵轉車要出閘入閘好複雜，地鐵線路圖又密密麻麻，轉錯車出事率極高，所以第一次去首爾的朋友仔，住明洞真係不是一個好選擇！
02 | 嘈到爆！酒店真係勁多人！
試過旅行旺季去首爾朝7晚10做嘢，夜晚11點先拖住疲累的身軀返明洞酒店，一踏入酒店門口就知出事，因為真係好多人，全部強國大叔大媽喺大堂鬼殺咁嘈，排隊爭入電梯上房，最終等咗成30分鐘……
諗住返到房冇事？錯！旁邊房大媽用丹田吹水吹足幾個鐘，上層大叔又不停叫囂，最後擾攘到3、4點先開始安靜，我表示超無奈！最慘係……大叔大媽兵團晨早6點又出發，超高聲浪勁過鬧鐘！所以去旅行想舒舒服服休息，旅遊旺季時，千祈咪揀明洞！
03 | 絕對不是行街首選地點
揀得住明洞，好多人都係因為貪方便，諗住一落酒店就可以行街！但事實係……去過明洞就知絕對唔係行街的好地方！雖然妝物店林立，但款式唔特別，行街時又迫勁多人，最後行一陣已想放棄！
女仔都仲可以去買妝物，男仔就真係只可行Aland、8 Seconds、ABC-MART等等，選擇超級少，最後行1、2個鐘已經想轉去弘大、梨大等地方，已經肯定永不回頭！所以點解要為一個只會行一陣的地方，而住喺嗰度呢？
（編按：夜貓子注意，明洞行街不方便的另一個原因是，不少店鋪大概 10點就會關門，喜歡逛夜街的朋友建議選擇東大門附近的酒店，因為該區不少商場會開至凌晨 4點，而且行餓了還有餐廳營業！）
04 | 最嬲！成日被人當係強國子民！
呢樣真係終極難頂！因為你在明洞任何舖頭，都一定會被當成強國人！雖然大家都明白店員講普通話係想方便溝通，但當你用唔鹹唔淡的普通話或英文回應時，佢哋一察覺你係香港人，就一定會黑面+是但招呼+睇唔起你+覺得你阻住做生意，寧願去招呼會爆買的「真。強國人」，咁 嘅服務態度實在令人嬲到爆！
其實明洞多數係連鎖服飾或美妝店，其他地區都一定搵到，為何要留在明洞受氣？而酒店員工亦會當你是強國人招呼，嘴藐藐令人難受！我發誓，從此不會住明洞！
05 | 突然發現，便利店好難找！
大家去明洞時，有冇注意到一件事，就係明洞區好少便利店！平時一條街總有一兩間GS25、CU、7-Eleven，十分好找，但明洞的便利店大多隱身在小巷裡，加上附近充斥各種店鋪，一不留神就會錯過了！可能因為被大財團收購咗商場、服飾店及美妝店，明洞大街上的便利店不算多。
當然唔係間間酒店都係咁，但便利店出現率偏低！所以住明洞夜晚想食雪條食宵夜，不熟路的朋友要花點時間找便利店了。
網民分享中伏經歷
不少網民都留言，分享了自己的中伏經歷，舉出明洞酒店並非首選的其他原因。
網民建議：忠武路、東大門歷史博物館
也有網民認為，上述情況只限於明洞大街的酒店，指明洞也有其他地區的酒店值得入住。不過，除了明洞，網民亦建議了以下地區的酒店。
