廉航當道，幾乎每隔一個禮拜就收到電郵通知深夜12點要捕平機票，傳統航空公司一係cut cost保命，一係割價「揼石仔」賣機位。國泰推出fanfares 4年多，新加坡航空（下稱 新航 ）最近推出名為「iLoveSQ」優惠，每周推出9,000張平價來回機票益街坊，執平機票去旅行又多一個monitor list喇！
由2月16日開始，新加坡航空（SQ）每逢星期四、五都會推出由香港出發的「iLoveSQ」驚喜票價優惠，玩法跟國泰的fanfares類似，即每周推出3個不同地點的劈價機票，每周平機票足有9,000張，每次優惠只售兩日，首輪頭炮就以$350（連稅$1,305）起來回峇里最搶眼，來回新加坡亦只需$600（連稅$998）起。雖然連稅後來回票價變成過千，不過依然比國泰、港航直航機票抵玩好多，而且票價已包經濟艙30kg行李，有飛機餐食（轉機可以食足4程餐），仲有里數可儲，實在抵到爛！
劈價機票的服務雖然跟平常機票睇齊，不過機票內裏隱含不同條款，以第一炮的優惠為例，來回峇里或新加坡的機票都需要二人同行，而且逗留期限最短3日最長5日（相對較冷門的泗水則可以一人出發及最長可逗留10日）。訂票時記得要輸入優惠碼「ILOVESQ」才可進入頁面，每逢星期四晚12:00已經可以訂票，想得知每星期的優惠，不妨訂閱E-newsletter每逢周四留意電郵！
記者試訂峇里機票，輕易搵到最低價平飛。
