平時去澳門一定會瓹窿瓹罅食豬扒包、木糠布甸等地道小食，不過好浪費時間，唔識路搭的士真係勁貴囉！今次發現喜來登中的盛宴都會有一個「土生葡人下午茶自助餐」，聲稱可以一炮過食到所有澳葡小食，係咪真係咁堅先？就算星期日放假，admin我都決定犧牲小我，為大家過大海試一試佢係堅定流！

驚見！超罕有傳統小食！

環境超大人客少，唔怕要同人逼及排隊！熟食款式都有20幾款，以下午茶計真係算係咁，豬扒包夠香脆，葡撻熱辣辣，水準唔錯，可惜無海鮮小食，如果有一定更滿足！拎拎下野食，突然發現一些未見過的菜式，似水餃叫「石鑿」（Apabicos），食落似蒸版的咸水角，不過煙煙韌韌口感唔錯！

私心推介要食酥炸咖喱肉包，油炸後肉包不會太乾身，加上咖喱香口多汁，豬肉又入味，咬一啖即滿口咖哩香，真係忍唔住要繼續食！

剩係食葡撻？廿款甜品俾你揀！

食到一半飽，即去掃甜品！哇！數數下發現有成20款可以慢慢揀，真係食幾團都食唔晒！除了必食葡撻，其他甜品都幾有驚喜，葡式什錦水果雪芳蛋糕就夠鬆軟，水果酸酸甜甜勁開胃!

木糠布甸口感有層次，豬油膏又帶欖仁香，作為極罕見傳統小食，點都要試一件！最愛是有埋傳統的麥芽糖餅，兒時回憶真係即刻返晒黎呀！講真，真係齋食甜品都夠飽囉！

總評：勁抵食下午茶自助餐！必試！

雖然只在星期六日供應，但係水準一流，最重要是容易Book位，而且真係可以一次過食到勁多款澳葡小食，而且夠飽肚，之後隨時可以唔洗再食dinner，仲要係$148勁抵價，真係值得一試！

水準：★★★★☆
種類：★★★☆☆
環境：★★★★☆
服務：★★★★☆
價錢：★★★★★

喜來登金沙城中心酒店盛宴自助餐

地址：澳門路氹城澳門望德聖母灣大馬路喜來登金沙城中心酒店1樓
電話：+853-2886-6888

時段：逢週六及週日3:30pm-5:30pm
收費：成人HK$ 148、小童HK$ 78
備註：另收10%服務費