唉！呢期阿珍同班 fd子 都好黑仔，竟然 同時間 收到之前旅行 自駕 租車 超速 的牛肉乾通知！係，基本上超速就一定係唔啱㗎啦！不過呢，人總有錯失，如果真係咁……唔小心開快咗，都希望你有面對以下事件的心理準備！
歐洲 | 咪信GPS 過數要小心
首先要面對的，就係無啦啦被人碌咗張卡！其實喺大部分歐洲國家，如英德法、奧地利等等，自駕 租車結束後，再收取任何費用，都一定要問過持卡人，唯獨喺意大利要小心，某些租車公司，條款寫明，一有違規，即可以喺 不知會準持卡人 的情況下收手續費！而所謂的手續費(罰款)，就係向政府提供你的資料，每犯一收，好甘㗎！好似朋友 B 超速 咗 3 次，就被人收 90 幾歐羅(約HK$780)，真係好肉痛！佢仲話，最激氣係，佢揸車時仲不斷讚個 GPS 勁，會自動報告「快相」位，以為避開晒，點知咁唔準！另一怒氣位係，牛肉乾要 3 個月至半年內先寄出，都唔知自己係咪真係超速！
日本 | 賴皮唔找數 咪旨意再租
日本 自駕 真係太普遍，流傳的蠱惑招數亦特別多！年年都去北海道滑雪的 S 先生就好招積咁同阿珍講： 「上月去二世古租七日車，還車嗰日瞓晏咗，心都怯埋，遲還一個鐘要畀幾百蚊㗎！好彩日本老死話我知，日本租車公司訂明信用卡授權最多一個月，但 超速 的牛肉乾一定係一個月之後先寄到租車公司，可以賴數唔使找！最後我開盡到 130 準時還車，點知之後真係收到牛肉乾，成千蚊，梗唔畀啦！」咁危險的事，大家千祈唔好做，一來超速本身危險，二來賴數後再用自己個名租車，會即刻被揭發，做人咁唔光明正大，有咩謂呀？
兩岸 | 假人有料到 咪以為靠嚇
執法有軟有硬，講到防止超速的伎倆，就一定是兩岸同胞最有創意！香港之前喺北區試行過假人交通警，台灣一早有雷同概念，但咪以為係杜遊珍純粹靠嚇呀，部分假人隔籬真係有快相機！
