中國網民口出狂言：「法國終於有報應！」
當全世界都在傷心，有中國網民竟口出狂言，說看到這棟象徵法國歷史與精神的建築物被大火焚燒，直說法國氣數將近，甚至提起1860年英法聯軍之役，清朝的圓明園遭到焚毀，因此巴黎聖母院這次被燒是「報應」、「活該」，有中國網友叫好。
除了黐線，我無話可說，別人國殤，火都未燒完，就在傷口上灑鹽，除了小心報應，我亦無話可說。
在香港，則一時之間很多人跑出來貼相啊，話好傷心呀咁，令到我諗起近年很多人喜歡RIP，但RIP的禮數，你懂嗎？
01 | 貼啱相
千祈咪download相再post自己page又唔講出處，擺明扮在案發現場呃like，「冇事吖嘛？」「小心啲呀喺巴黎！」好多人不知就裡，以為你身處當地會關心你安危，浪費別人一番好意又何必呢！除非你想增加engagement。
就算你真的在巴黎，也不要將新聞相copy and paste，感覺只想要attention。講到偷相，就算是個人facebook也要有此意識，最好是轉載新聞，最方便，有晒出處。
02 | 咪懶熟
未去過聖母院，或去過一、兩次，就唔好講到自己屋企咁樣，我問你：「聖母院甚麼時候落成？聖母院法文怎樣讀？有邊套電影在聖母院拍過？」既然唔多熟就唔好扮晒嘢。同樣地，有邊位名人啊朋友啊過咗身，諗深一層，有冇真係咁熟，有冇必要公開悼念？千祈不要利用死人死物，會有報應啊！
03 | 三思而後RIP：
在facebook post一個RIP只需一秒，但每年都會彈出來，你想每年都有人remind你嗎？老實說，如果真的如此傷痛，下秒下年我都不想想起！如果真的如此傷痛，其實每分鐘都會記起，真的不需要刻在facebook的牆上了。
而且，通常全民RIP的事情，應該已經達洗版級，我們還需要多一個冇內容冇insight冇情感的RIP post嗎？如果你是第一個知道，或許post都有啲新聞價值，起碼可以提醒別人，有這樣的事情發生；但當你是第1,128個人post，就會諗到冇人想like了。
04 | 鍵盤戰士
既然傷痛，麻煩不要只做鍵盤戰士，真的找方法在現實世界幫忙，捐錢最實際！不斷找回聖母院的舊相來post真的無補於事，除非你想show off一下去過幾多次巴黎，同埋經過過幾多次聖母院。
最後最後，與其熱中RIP，不如好好擁抱現在，有甚麼人未見就去見，有甚麼地方未看過就去吧！懷念過去常陶醉，不過舊時都跌咗落海，就無謂諗番喇！