去尼泊爾Pokhara，就可以試玩獵鷹滑翔傘（Parahawking）！
同平時玩空中滑翔唔同，Parahawking係行雙教練制，除咗必備型仔教練喺你後面磅住你飛，隔離仲有真正嘅埃及秃鷹陪你一齊飛。鍾意嘅話，你仲可以試吓喺高空餵鷹添！
件事係夢幻到難以置信嘅！搵秃鷹陪你飛？搵秃鷹Sir陪你飛都難啦！不過有圖有片有真相。Parahawking，就係一種混合空中滑翔同馴鷹嘅魔幻極限運動。去片吧！
駐尼泊爾英國人首創 本意為拯救秃鷹BB
其實Parahawking係由英國鳥類愛好者Scott Mason一步一步發展出嚟嘅，呢位細細個就夢想可以同鳥兒一齊喺高空飛翔嘅夢想家，十幾年前環遊世界經過尼泊爾嘅Pokhara，無意中救咗兩隻埃及秃鷹BB，由於救出嚟嘅秃鷹一直被人類照顧，所以長大後就無法再重 投野外生活，於是Scott索性定居喺尼泊爾兼專心訓練兩隻秃鷹bb，喺空中滑翔時做天空領航員。因為秃鷹天生識得喺空中搵出最穩定嘅上升氣流，所以可以喺空中滑翔時幫手領航，令滑翔飛行可以更高更遠。
有隻秃鷹企喺你隻手上面同你一齊飛，難以想像！
Parahawking途中，仲可以順便玩埋高空餵鳥。通常喺秃鷹成功搵到上升氣流之後，佢哋就可以喺乘客手上得到食物，可以話係秃鷹的另類搵食法。
現役非人類Parakawking教練：
唔多講嘢嘅Kevin同唔擅長攪笑嘅Bob。
創辦人Scott話攪Parahawking其中一個原因係想保護喺尼泊爾就嚟滅絕嘅秃鷹，加強人類對老鷹嘅保護意識。除咗收益會用嚟做保育工作，仲有一間可以睇秃鷹覓食嘅「秃鷹餐廳」。
Parahawking嘅故事仲曾經拍成一套電影，叫“Flight for Survival”。雖然個名有少少悽酸，但故事真係感人，所以拎過唔少電影獎項。而係今年尼泊爾地震後，Scott更曾經義賣呢套電影嘅DVD，籌咗唔少錢幫助災後重建。
喺尼泊爾大地震後，由於遊客少咗，Parahawking都曾經面對過客人減少嘅問題。但近來生意已經回復穩定，而且仲推出咗為支持災後重建嘅Karma Flights Experience 1 日套裝，除咗包一次Parahawking之外，仲加一次Falconry Experience(馴鷹體驗)，一次玩曬兩樣嘢。每次有客人參加Karma Flights Experience，團隊仲會捐出$5,000盧比（約70美元）俾飛行救援隊Karma Flight協助起學校同其他災後重建。
Parahawking:
價錢：＄168英磅/Karma Flight Expericne-1 Day Package（包早餐、午餐及晚餐）
時間：每年十月中至翌年四月
地點：尼泊爾Pokhara Maya Devi Village