小斯教路 | 信用卡優惠！17 年 check-in 後必做的二三事

魚蛋粉 lounge 相信大家都聽唔少，亦係唔少香港人 check-in 後必做的一件事！但究竟依家喺香港 check -in 之後，有啲咩係要做先唔會蝕畀佢，同埋又有啲咩credit card係可以免費做到呢？依家就同大家整理一下究竟可以點樣換免入lounge、換雜誌、買/換咖啡！

01 | 入 lounge／貴賓室，有免費嘢食 / 按摩 / 沖涼 / 剪頭髮

喺香港機場入lounge主要有幾個方法，一係坐business / first class，呢個唔交代了！二就係你本身係某航空公司的高級會員，呢樣都唔同大家交代啦！而最平又最簡單又入到香港lounge的方法，就係有CX Elite 信用卡、Priority Pass、銀聯鑽石卡、日航AEON卡、建行同ICBC的港航信用卡。

a | CX Elite

可入的lounge：全年任入全球的環亞lounge，包括香港、台北、新加坡、倫敦、溫哥華、吉隆坡、馬爾代夫、暹粒等等

年薪要求 / 入手方法：30萬 (不過批得好鬆)

注意事項：附屬卡都可以任入全球的環亞 lounge；主卡首年送一張一年可以免費入4次 lounge 的 Priority Pass

b | Priority Pass

可入的lounge：全球的Priority Pass lounge，基本上都cover埋所有的環亞lounge

年薪要求 / 入手方法：

・申請Citi Prestige信用卡，就會送一張全年任入的Priority Pass
・開CX Elite，主卡就會送一張全年可以免費入4次的Priority Pass
・申請渣打出糧戶口開Priority Banking，然後再開Priority 信用卡，首年又係會送一張全年任入的Priority Pass

c | Citi Premier Miles

可入的lounge：基本卡及附屬卡均可每年免費12次入指定的環亞lounge，包括香港、台北、新加坡、倫敦、溫哥華等等

年薪要求 / 入手方法：36萬年薪

注意事項：注意每次用完環亞lounge後的30天內，要用番張Citi Premier Miles於本地/海外簽帳$5,000，唔係會收番你$200

d | 銀聯鑽石卡

可入的lounge：由2017年1月1日起至12月31日，每張銀聯鑽石卡可以免費入香港的環亞lounge 3次

年薪要求 / 入手方法：15萬年薪（HSBC／Citi／交行／創興）、25萬年薪（上商銀聯）

注意事項：由2017年3月1日起，必須於指定預約網站進行預約，並至少於出發日前1天及只接受最多30天之預約。每日名額為100名。至於指定預約網站將會遲啲公布

e | 日航AEON卡

可入的lounge：每年累積簽帳滿$150,000，下年度就可以用香港Qantas lounge一次，佢嘅叉燒飯係最出名

年薪要求 / 入手方法：冇限制，基本上有份工就批

注意事項：一定要坐日本航空的航班先可以入澳航個lounge

f | ICBC / 建行港航信用卡

可入的lounge：ICBC 一年可以入5次港航lounge，但只限自己唔可以帶人；建行都係一年可以有5次港航lounge，但可以帶人，當扣一次quota

年薪要求 / 入手方法：25萬年薪（ICBC）／15萬（建行）

注意事項：一定要坐香港航空的航班先可以入港航個lounge

至於可以喺外國入到lounge的卡選擇就少好多，除咗以上介紹的 CX Elite、Priority Pass、Citi Premier Miles 外，剩下還有東亞JCB白金卡可以於外國入 lounge。

g | 東亞 JCB 白金卡

可入的lounge：可以任入日本、韓國、大陸、新加坡、泰國、夏威夷的JCB 白金機場貴賓休息室

年薪要求 / 入手方法：15萬年薪

CX Elite 卡入 lounge 最有用

大家可以睇到，其實入 lounge 最有用的卡就係張 CX Elite，因為佢可以無限咁入全球的環亞lounge，即係香港同外國都入得。如果咁啱中國家都唔緊要，佢仲有張Priority Pass畀你用，不過記得係限次數啦！不限次數的 Priority Pass 就只係得開 Citi Prestige 或渣打出糧戶口 Priority Banking 先有啦！另外值得一提的係東亞JCB白金卡，佢又係可以無限咁入其他國家的 lounge，雖然就好鬼流好多都係得嘢飲 (特別係日本)，但志在有個免費地方畀你坐下啦！

環亞 lounge 記得儲分無須對名全家用得

另外，如果大家入開環亞lounge的，記得要申請埋張Arrture卡儲分。Arrture卡係你每入一次環亞lounge就有100分。所謂的入一次儲100分，即係你去一次旅行，入晒香港的arrival lounge + 境內lounge 2個，加回程的lounge一個，再加返到嚟香港再入多次arrival lounge，就已經儲到500分。同埋Arrture卡唔對名，基本上你成家用晒同一張都得！啲分三年先到期。儲夠2,000分，即係入夠20次，就可以換到一張lounge券，張lounge券最方便的就係可以畀咩人用都得，冇任何條件，搭乜airlines都可以用啦！

02 | RELAY+中華書局！免費／平換雜誌

可以免費或者以跌都跌咗的價錢換雜誌的卡主要有兩張，最著數嗰張梗係 DBS 張 Black Master Card，check-in之後就可以去禁區裡面的RELAY，出示番DBS Black Card及有效登機證，就可以換到價值$15的報章/雜誌一份，唔夠補錢就可以。呢張卡雖然寫就寫要24萬年薪，但其實勁易批，基本上你肯申請就得！

RELAY喺禁區裡面有4間，位於T1第六層離港層中央客運廊 (7:00 – 00:00)、第六層離港層南客運廊 (7:00 – 00:00)、第六層離港層西北客運廊 (7:00 – 23:30) 同T2第三層 (7:00 – 23:00)。

另外仲有張就係交行的銀聯鑽石卡，只係15萬年薪就申請到。憑信用卡同登機證，去機場間中華書局就可以$1換取價值$15的報章/雜誌一份，一樣唔夠補錢就可以。機場的中華書局有3間，包括喺T1離港大堂第七層7T115號舖 (6:30 – 23:00)、T1第六層離港層西南客運廊6Y591號舖 (7:00 – 23:00) 同埋T2第五層5P078號舖 (7:00 – 23:00)。