撰文：卡｜圖片：Twitter、電視截圖
北海道暴風雪
上星期四起，北海道天氣明顯轉差，不停有暴風雪吹襲，並形成「白盲」現象。截至今日（21日）為止，暴風雪現象依然持續。由於北海道周邊上空有伴隨強烈寒流嘅低氣壓掠過，道內以西南部為中心，會局部性降下大雪。
早前大地震震央嘅安平町，於本日早上8時錄得3小時32cm降雪紀錄！石狩地方亦預計到明日中午，會有近40cm積雪。
因大雪嘅影響，超過30班航班取消，及58班JR/新幹線停駛。滯留北海道嘅朋友，記得要小心！
「白盲」現象
「白盲」現象指被雪或雲所包圍，視野變得一片白茫茫的現象。尤其是於雪山中遭遇強烈暴風雪而形成「白盲」現象時，會連雙腳都變成一片白色，身體幾乎無法動彈。雖然多數作為雪山登山遭遇嘅其中一種意外而被忽略，但其實喺滑雪場、降雪量大嘅都市街道上，都好有可能發生！
成因
造成「白盲」現象嘅原因大致分為3種：
1）因暴風雪或強風吹起厚積雪而導致白雪於空中飛舞，遮擋視線。
2）因降雪量大而遮擋視線，繼而引起此現象。
3）因被濃霧包圍而引起此現象。
雪山登山時最容易遇到的為第1、2兩種情況，而且危險度特別高。
「白盲」狀態下的6種危險要素
1｜失去方向感
平時並冇特別意識到，但其實自己正面向嘅方位係以周圍嘅景色為基準判別嘅。當四周圍都變成一片白色，便會失去判別自己同其他物件嘅位置關係，唔知自己正面向邊個方向。
呢種情況下，就需要使用指南針確認身處嘅方位。不過就算認清咗方位，都未能知悉與目的地嘅距離。如果身處雪山，即使唔係「白盲」狀態中，都應時常把握好自己嘅位置，並觀察周圍有咩物品/建築物。
2｜上下感覺混亂
失去方向感呢項唔多唔少都預想到，但實際上其實會連上、下感覺都變得遲鈍。例如於地圖路線上睇，自己嘅位置應該係上緊斜坡，但自己好難判別其實係上緊斜坡、落緊斜坡，定係行緊平路。
無法判別自己係上緊斜、落緊斜嘅話，較難正確把握自己於地圖上嘅實際位置。呢個時候可暫停一下，確認自己係比前面嘅人處於較高，定係較低位置嚟確認目前路線，以及觀察雪面向邊個方向傾斜。
3｜難以判斷距離感
同失去方向感一樣，「白盲」狀態之中，周圍嘅景色其實只能模糊地睇到少少。由於無法從四周景色中將自己嘅位置劃分開，因此，有機會同前面嘅人拉開咗距離，即使有記號，亦看似係飄浮於雪白空間中嘅物件，無法正確把握好距離感。
回過神來，先發現自己已身處崖邊並唔係誇大說辭，因此，須小心注意！
4｜無法直線行走
即使弄清方向，一旦傾側少許，便有機會同目的拉開更遠距離，令路線變得唔同。
視野良好嘅話，可從直行方向中所見到嘅景色或物品嚟判斷自己是否正筆直向前，如有攜帶GPS嘅話，仍能夠判別行走方向；冇嘅情況下，則可將紅布綁到長棍上，製作認路嘅旗仔，並將旗仔以等距插到雪上，確保前進方向正確。
5｜見唔到同行者
遇上嚴重「白盲」現象時，甚至無法看清自己1米前方嘅景物。
呢個情況下，好有機會令你無法見到同行嘅夥伴/友人。因此，須經常確保自己與同行者們保持一定距離，小心唔好走散。
6｜腳印好快消失
雪山登山有別於夏季登山般按登山道行走，自己嘅腳印痕跡同時會成為後方同行者嘅行走路線指標，亦係回程路線嘅幫手。
但「白盲」狀態之中，有大量雪花激烈飄盪，只需數分鐘，便會令腳印逐漸消失。
對付「白盲」的參考方法
1｜時常把握自己身處的地方
出現「白盲」現象嘅，多數係廣闊嘅雪原而非樹林。由於周圍變得雪白一片，唔思量好對策，好容易就會於風雪中動彈不得，最後只有「等死」。
因此於雪山中，應時刻把握好周圍景物位置，以及於地圖上確認自己嘅位置。往邊個方向、點樣行會有避難小屋或躲避風雪嘅地方，一旦唔好彩遇到視野不良嘅情況時，便能冷靜地應付目前狀況。
如果周圍實在係咩都冇，無法確認方向時，考慮到雪檐及山崖等危險地，唔勉強行動並等候視野回復，都係其中一種有效做法。不過因為風雪強烈，體溫會慢慢下降，應打開帳幕等可擋風嘅工具。
2｜保持冷靜
視野突然變成一片煞白，任誰都會覺得不安。但當下應保持冷靜，唔好勉強前行，而應重新確認自己正身處嘅位置。
若因焦急而勉強前進，會令目前所把握到嘅位置變得混亂模糊。腳印亦隨即消失，令遭難嘅可能性隨之提高，首先應冷靜下來，思考對策再行動。
3｜攜帶GPS
即使有地圖及指南針，都好難時刻把握好自己現正身處嘅位置。登雪山嘅話，應帶上便攜式GPS，以便把握好自己身處嘅地方。
雖然現時有唔少智能手機apps提供定位功能，但於風雪及嚴寒之中，好容易會令智能手機因低溫而開唔著，又或難以操作。因此，須注意使用效能。
4｜如受困於車內……
北海道當別消防局指，於都市市內發生並困於車輛中時，應打開手機內嘅GPS功能，同時為咗防止一氧化碳中毒，應記得換氣及於車內等候救援。
如於駕駛中時遇上「白盲」，則應以前方車輛嘅車尾燈及標示道路界限/方向嘅指示牌作為記號，唔好停車，而係保持慢駛車速繼續前進。
一旦要落車步行時，最好等到暴風雪停止先行動。即使只有一瞬間，都會有視野突然清晰嘅一刻，喺呢段時間中，應立即把握好自己身處嘅位置，並搜尋唔會吹到風嘅地方躲避。
延伸閱讀：北海道滑雪套票2019｜冬天必去景點推介：天空步道、冰書咖啡廳、滑雪班放題⋯⋯