加拿大打工送地 咁正？我哋呢班打工仔～一生一世為錢幣做奴隸～成日聽見阿乜哥嘜叔喺電視用唔知幾多十億百億投地，你以為遙不可及？依家機會擺喺你眼前！去加拿大嘅布雷頓角島可以 打工送地 ！
撰文：Joey（原文刊於《經濟一週》）
加拿大有一個人口只有13萬，但面積超過一萬平方公里嘅島嶼－布雷頓角島（Cape Breton），嗰度有一大片無污染嘅自然環境，而且四季氣候舒適，最適合愛好大自然嘅朋友，但可惜近年呢個小島正面臨種種挑戰。
呢個小島因為地區經濟並唔發達，令到本來已經少嘅人口外流，仲有不斷下降嘅趨勢，尤其是勞動階層，結果導致呢個小島出現勞動人口短缺嘅問題。
而住喺嗰度嘅人，最愁嘅唔係冇錢，而係冇人，不過因為佢哋擁有大片土地，所以有地主就諗咗一條絕世好橋，即刻吸引咗世界各地嘅傳媒追訪。
珊迪．麥克林（Sandee MacLean）同希瑟．奧斯汀．庫隆布（Heather Austin Coulombe）兩姊妹係當地一間商店店主，佢哋家族坐擁一大片土地，但係就請唔到人做嘢。為咗吸引多啲人入去工作，佢哋喺facebook以「美麗小島要人」為題招聘工人，雖然講明人工唔高，但佢哋畀到你嘅待遇相信空前絕後：「只要你喺度做超過五年，你就可以獲得我哋送贈嘅兩畝地！」
佢哋嘅請人要求好簡單，只要你係愛護環境，希望同佢哋一齊創造出一些值得你自豪嘅事物就得。佢哋原本預期會有數十個申請，但後來查詢人數竟然多達五萬多人，反映土地問題真係唔係香港獨家喎！
不過可惜嘅係，現階段佢哋只接受國民申請，因為仲未被納入非加籍人士工作計劃入面。不過，小編知道有好多香港人有加拿大戶籍，佢哋可以考慮考慮。
