自助旅行經常都會以地鐵作為主要的交通工具，但大家試過有無停低細心欣賞世界各地的地鐵站？其實唔少地方的地鐵設計都非常出名，例如莫斯科Komsomolskaya的古典車站、布拉格Staromestska的金屬泡泡車站、慕尼黑 Westfriedhof的燈光車站……今次為大家精選10個全球最靚的地鐵站，下次搭地鐵記得預多少少時間，慢慢欣賞咁靚的地底建築！
里斯本Olaias – 葡萄牙
1998年里斯本舉行世界博覽，同年建成的Olaias作為到世界博覽必經的中轉站，用上妙想天開的設計同色彩運用，令到除左博覽會外，遊客多咗一個必去的現代藝術景點！
紐約 Fulton Transit Center – 美國
啱啱在11月先投入服務的轉運中心Fulton Transit Center打破一貫紐約地鐵站的陰森感覺，設計時尚得來，仲好闊落同光猛！除左靚之外，Fulton Transit Center仲好有實際用途，全紐約總共有11條地鐵線交會於呢個運轉中心，相信將會成為紐約市一大地標。
莫斯科Komsomolskaya – 俄羅斯
作為全市其中一個最繁忙的地鐵中轉站Komsomolskaya，當然都唔會失禮！以巴洛克風格設計，用上大量畫有歷史故事的瓷磚同掛滿吊燈的站頂，令到Komsomolskaya 好似古堡咁優雅。記住要細心睇下磚牆上的故事，聽講靈感係來自二戰大將Stalin的演講！
高雄美麗島站 – 台灣
高雄美麗島站以歷史事件「美麗島事件」命名，但設計上就完全同「暴力」相反！設計師Narcissus Quagliata以「風、火、時間」同祈禱為主題，用上4500塊彩繪玻璃建成的「光之穹頂」，一直都吸引無數遊客，仲被譽為全球最宏偉的玻璃建築之一。
Khalid Bin Al Waleed Station – 杜拜
杜拜地鐵出名的唔只係無人駕駛的列車，仲有Khalid Bin Al Waleed Station的設計，當中最為特別的水母吊燈發出陣陣藍光，令到一踏入Khalid Bin Al Waleed Station就好似置身於大海之中。
斯德哥爾摩T-Centralen – 瑞典
正所謂「寶物尋歸底」！斯德哥爾摩的T-Centralen地鐵站，一開始踏入建於地面上的車站平平無奇，但當大家行入少少就會發覺成個車站的顏色同形狀慢慢變化，當大家走到好似鍾乳洞的藍白色外牆設計，忍唔住要影相時，就代表大家已經身處地底啦！
聖地亞哥Universidad de Chile – 智利
聖地亞哥的地鐵站每個都有屬於自己的特別設計，當中最特別的就係Universidad de Chile站，呢個站裡面有一幅好巨型的壁畫，由藝術家Mario Toral所畫，以壓克力彩同油彩畫成的璧畫記載住智利由古至今的歷史，好值得去睇。
慕尼黑 Westfriedhof – 德國
1998年落成的慕尼黑地鐵站Westfriedhof起初寂寂無名，但在2001年的小翻新中，加設咗11個會交替發出藍、黃同紅色的燈光裝置，令到地鐵站沉浸於不斷漸變的三色之中。
法蘭克福Bockenheimer Warte – 德國
要數到最特別的地鐵站入口，就非Bockenheimer Warte莫屬，設計師Zbigniew Peter Pininski為咗令自己設計的地鐵站與別不同，竟然將地鐵站入口設計成陷入地面的狀態，唔知仲以為發生完地震！
布拉格Staromestska – 捷克
其實布拉格每一個地鐵站都應該入選，因為布拉格地鐵站採用一貫金屬「泡泡紙」系列的設計一直都好受到世界各地遊客垂青，選中Staromestska，主要原因在於佢金色同紅色的配搭最吸引遊客的相機！