資料來源：Trivago
宣傳咗大半年有多，新一齣《星球大戰》終於都上畫，睇完戲都唔夠喉，不如就出發去搜找全球最有太空 Feel 嘅酒店，住返夠本感受原力，May the force be with room！
1）西班牙 – 野生捕獲 R2D2 Bell Boy
作為太空主題酒店，圓型太空艙窗戶、巨型太空人畫像、球形 designer chair 呢啲自然唔少得。西班牙巴塞隆拿市中心的 Barceló Sants 除咗有齊以上所講嘅「太空裝置」之外，更「重金禮聘」R2D2 機械人嚟酒店做接待員。R2D2 喺酒店度周圍走，絕對歡迎住客捕獲，不少住過酒店的網民紛紛上載同 R2D2「偶遇」嘅合照同 Video，真係興奮到 We 嘩鬼叫㗎！
2）瑞典 – 離地 6 米 UFO 樹屋睇河景
瑞典嘅 Treehotel 位於僻靜嘅 Harad’s Pine 森林中，只有 6 間獨立樹屋客房，全部依照 UFO 造型，懸掛於離地 6 米高嘅松樹上，可以睇到 Lule River 靚景，好有外星人綁架 Feel！房內設備都媲美太空船咁先進，當中廁所更有裝置會以 600 度高溫將排泄物燒成灰燼，堪稱新奇體驗。
3）瑞士 – 實感體驗！見真太空人+模擬飛行
瑞士蘇黎世 Kameha Grand 酒店，內有由德國設計師兼準太空人 Michael Najjar 親自設計嘅太空套房，地氈係以哈勃太空望遠鏡影嘅星際相片、房燈就係彷火箭發射器射燈，仲有太空人手套做裝飾，極具實感！成個太空套房完美體驗一晚要 $15,360 起，價錢雖然唔嘢少，但有得住勁 Cyber 嘅套房之外，仲可以同真太空人 Michael Najjar 見面參觀 Studio，再玩埋 1 小時 A320 飛行體驗，真正的太空迷應該會覺得物有所值嘅！
4）新加坡 – 「小兒科」火箭睡床
相對上面幾間太空主題酒店，新加坡精品酒店 Wanderlust Singapore 的太空主題房就顯得較為「小兒科」，不過就展現出童心未泯的一面，帶埋小朋友一齊住都得、感覺唔會太過冷冰冰！酒店住於小印度區，樓高 4 層每房各有不同主題，位於頂樓嘅太空主題客房，以全黑嘅牆身同天花造成星空效果，牆上有一架紅色嘅 Q 版火箭做裝飾，爬過火箭嘅樓梯就可以到閣樓的睡床，機關重重小朋友一定最 like！
5）中國 – 大陸都有？升級版太空艙酒店
強國都有太空主題酒店，近近哋都可以去深圳寶安區嘅鵬恒太空艙酒店體驗吓！太空艙酒店其實都唔係新鮮事，日本一早就好流行，不過呢間鵬恒酒店就係升級版，每個艙外型似十足巨型焗爐，碌架床上裝有紫色 LED 燈更有 Cyber 味！每格床位都有齊 WiFi、平面電視，算係麻雀雖小五藏俱全，仲有機械人待應捧餐，都幾多花臣㗎！
