之前熊本觀光部長Kumamon訪港，多數都只限商場或者超市活動，不過11月29日就好唔同，Kumamon將會喺航空公司安排下，走入香港鬧市，同大家近距離接觸，打算去同部長合照的朋友，除咗帶備相機，請記低以下備忘！
01.熊出沒時間＆地點
今次出沒地點橫跨港九，由中環碼頭玩到去尖沙嘴，然後黃昏再去銅鑼灣行人專用區，絕對係由朝玩到晚！早起身的朋友，請準時11:30am去中環天星碼頭集合，好大機會埋身同Kumamon合照！提提各位，有心捕獲Kumamon的朋友，要留意部長的小秘密，就係每次露面只限30分鐘，定時就會消失半小時唞唞，大家到時要聽工作人員安排，唔好太痴纏呀！
02.熊部長點過海？
整個出巡活動中，盛傳1pm至1:30pm將會係全日焦點，因為部長會計劃搭天星小輪過海！為咗親近市民，唔會包船，同市民大眾一齊過海，100%欣賞中午維港景色（主辦單位同GOtrip編輯部透露，具體情況要視乎當日天氣狀況，以及民情洶湧程度，希望部長可以成功搭船啦！）
03.同場有禮派？
如果民情洶湧，又或者撞正部長休息時間，大家唔好失望，Kumamon部長準備咗幾件小禮物派畀大家，包括：
A. 大小朋友都啱戴嘅KUMAMON 帽
B. 令人愛不惜手嘅KUMAMON 月曆
C. KUMAMON 大頭卡片
04.提防熊暴走，唔好著短褲！
天氣已經轉涼，大家記得著多件衫！有心水清Fans記得，Kumamon部長絕對唔怕人多嘅地方，而且經常失控暴走，對上一次經典事件，就係今年4月出席尖沙嘴商場活動時，忽然撲去攬住嘉賓連詩雅雙腿唔放，麻甩性情盡展現，大家如果打算近距離合照，要有被熊抱、揭裙、偷襲的心理準備！
05.部長會唔會有特別造型？
光脫脫的熊本熊大家見過好多次，如果著咗制服會唔會更可愛呢？今次活動係為咗宣傳香港航空下月直航航線，早前官方發布的圖片也見到Kumamon身穿機長制服的造型，不過根據官方透露，星期日的活動比較奔波，部長換唔切衫，同時考慮到Fans會十分肉緊，部長未必會以機長造型現身，可惜啊！
最後畀多個小小貼士大家，除了街頭暴走，部長仲會拍攝一個網上影片廣告，嚟梗仲會有網上遊戲送機票，如果好想緊貼Kumamon消息，就要留意航空公司fb專頁！
