文：Cynthia、 Ellissa｜圖片來源：TVB、眾星Ig
少少劇透1： 翠如BB日本揸Mario Kart
Do姐一直喜愛亞洲地區，今次特登搵嚟黃翠如同農夫一齊去日本，行程可謂處處驚喜！首星期5集的嘉賓有翠如BB，從節目預告片中，睇到佢哋齊齊去攀石，估唔到翠如居然輸畀Do姐！然後又喺街頭玩高卡車飄移，可惜冇車牌的陸永就只好喺隔籬做啦啦隊！
少少劇透2：馬明丹麥 天然呆踩單車
第二個禮拜，Do姐、農夫找來馬國明一齊出發，同遊丹麥！嚟到有單車城之稱的哥本哈根，幾位主持決定親身體驗異國踩單車。而唔識踩單車的陸永就由C君載佢周圍去，二人「同車」的溫馨畫面大家可以喺TVB預告片先睹為快！而且馬明喺行程不斷擦Do姐鞋，相信擦出的火花比呆滯跳舞更爆笑！
少少劇透3：蕭正楠 意大利血拼
最後一站有蕭正楠加入旅行團，全新搭檔的四人組合不知道又有幾多笑料。齊齊去充滿高級品牌的意大利，飲飲食食少不免，當地的首飾、服裝名店一定引起佢哋的購物慾，一班主持又要大出血喇！
飛甩上輯嘉賓唯唯 記招現身撐場
齋睇今輯節目的預告片當然唔夠喉，今個星期一《Do姐再Shopping》率先為節目造勢，舉辦記者招待會，6位主持同嘉賓都齊齊出席，仲搵嚟上一輯兩位驚喜嘉賓梁烈唯同鄭俊泓「托蟹」出場。請Do姐食蟹為乜？唔通兩位被雪太耐？
Do姐唔鬧「垃圾」 新金句侮辱農夫
上一輯農夫幫Do姐起咗好多花名，被問到今輯有冇爆笑金句嘅時候，Do姐不甘示弱地表示，為咗唔成日叫兩隻嘢「垃圾」，仲獨創咗好多唔重複嘅侮辱金句教訓C君同陸永！記招上Do姐冇透露半點口風，到底有幾賤嘴？到時要睇節目，睇下Do姐點鬧佢哋先知喇！
陸永面青 剝牙慶生日
翻睇Do姐Ig，今年6月27日去到北海道拍攝期間正值陸永生日，冇得同屋企人及愛女慶祝，Do姐同劇組就諗住好warm咁畀個特別驚喜佢啦！點知陸永當日由朝早就開始面青青，原來係牙痛，要喺日本即時剝大牙！陸永仲大讚日本醫院服務超好，好到：「冇牙都要去剝一剝！」
嫌農夫醜 大讚同行男神夠養眼
成日嫌農夫唔夠有型嘅Do姐，今次就揀咗兩位男神馬國明同蕭正楠分別去歐遊。Do姐大讚對兩位男神好滿意，仲讚佢哋好靚仔！又話每次望望農夫，再睇下另外兩個嘉賓，就開心到見牙唔見眼！
農夫對Do姐從一而終
至於被問到農夫會唔會想好似森美咁，可以「二拖三」同年輕女藝人拍旅遊節目時，農夫就耍手擰頭，仲話：「睇下其他人，再望望Do姐，點都係Do姐最好、最完美！」記招就有咁多爆笑位，相信節目仲有大量精彩好笑對話，唔好錯過節目喇！
好事近？？蕭正楠 shopping睇婚戒
蕭正楠第一次同Do姐、農夫去旅行，Do姐深知蕭正楠需要，特登在意大利帶佢睇婚戒。蕭正楠接受訪問時直認當地求婚戒指「好平㗎」、「只係嗰百幾萬」，仲大讚喺米蘭睇嗰間店舖嘅手工戒指，工藝上真係完全冇得彈，好啱佢心意。到底有幾抵、最後又有冇買到？真係要睇過節目先知！
最想帶女友BB去Parma
被問到節目當中去過的景點，最想同女友去邊度，蕭正楠大讚意大利盛產巴馬火腿的Parma市，有好靚的教堂、特色茶座同幽靜氣氛，加上女朋友比較喜歡靜的環境，所以希望可以帶佢去Parma市。唔知觀眾睇完節目之後，會唔會心思思想同翠如BB去Parma 市二人世界呢？
翠如一邊做節目 一邊睇show
上一輯節目都有參與的翠如BB，今集面對Do姐更加放鬆更玩得，仲話農夫同Do姐的火花勁到可以做「花生友」企埋一邊當睇show，睇嚟今輯的精彩程度都好有保證。
深入夕張蜜瓜節
被問到整個節目當中，覺得最好玩最印象深刻的景點，翠如BB最記得「夕張蜜瓜祭」的拍賣環節，佢話過程真係好刺激好好玩，又可以超平價錢買到勁多蜜瓜，競投仲好好玩添！Do姐仲喺預告示範「蜜瓜搽臉法」，好期待呀！
推薦情侶 東京玩攀石
日本部分咁多景點，問佢最推薦情侶去的地方，翠如BB停咗5秒用心思考，最後推薦攀石場，話可以透過攀石睇到對方的優缺點，仲自嘲自己體能好差。到底翠如有幾唔擅長攀石？真係要睇過先知！
馬國明唔愛馬國 熱愛丹麥家具店
第二次參加shopping團的馬國明，今次以男神形象哄得Do姐勁開心，仲長知識了，發現丹麥原來唔係盛產曲奇的，原來丹麥好多其他特色嘢，當中最吸引到佢嘅，就係行家具店，可以布置一下自己間屋。
希望夥拍蕭正楠、曹永廉 拍「麻甩旅行團」
大台近年常常搵星主持旅遊節目，馬國明就表示自己都好想同圈中好友拍番輯，點名蕭正楠同曹永廉，希望可以拍番套「麻甩旅行團」，一定會好開心！睇完《Do姐再Shopping》，睇嚟又可以期待一下喇！
簽賬即享1蚊1里加抽獎送機票！全新DBS Black Card信用卡優惠即睇詳情！
成功申請DBS COMPASS VISA即送你ELLE Vortex 24吋鋁框行李箱，詳情按此！
延伸閱讀：超齡《嘩鬼上學去》！陸永、C君英國留學扮貴族， 5 大必睇搞笑位！
