男人的浪漫 | 成班麻甩佬去旅行，又係另1種浪漫

男女執行李大不同

每次同女朋友去旅行，佢都好似行fashion show咁，每日要着唔同衫，連手錶都要帶幾隻去襯番件衫。除咗服裝，仲有一大堆化妝品同護膚品，女朋友每次去旅行都會帶條大毛巾，用嚟沖涼之後抹身，根據佢所講，酒店嘅清潔工人會用房間客人用過嘅毛巾嚟清潔廁所……

仲有浴室用嚟墊地嘅毛巾，會連埋俾客人抹身嘅毛巾一齊洗，所以酒店嘅毛巾係相當唔衛生（我帶條面巾就可以抹身）。

男人出遊背囊搞掂 最重行李竟然係……

而今次「麻甩團」一行4人，冇1個人帶行李箱，全部只係揹住個背囊。行李最重嘅其中1位麻甩，佢帶嘅唔係化妝品同靚衫，而係1部PS4。相信每次去旅行都分秒必爭嘅女仔唔會理解到，去旅行帶遊戲機呢種玩法。但我哋呢班麻甩佬，去旅行就係想乜都唔理，放鬆一下。

喺泰國每日嘅行程，就係喺酒店附近食早餐，喺附近行下街，返酒店打機，打到肚餓落街食飯，買埋消夜再返酒店打機……冇錯，我哋呢班麻甩佬，最開心最放鬆就係呢種生活模式，鍾意食就食，玩就玩，瞓就瞓。

與老闆「斷絕來往」麻甩團盡情享樂

可能你會問，打機點解唔可以喺香港打？因為當你身處香港，手機就會不停響，即使係假日，工作都會死纏住你唔放。老闆一句：「跟一跟呢個e-mail。」成個放假嘅心情都會冇晒。

去旅行就可以名正言順拋低工作玩番幾日，就算個客搵你，覆佢一句：「唔好意思，我唔喺香港，我搵同事幫你跟跟。」呢種感覺真係難以言喻。

雖然呢幾日旅程好hea，喺其他人眼中好浪費時間，但成個麻甩團，都喺呢幾日得到最好嘅假期。

香港人，或者最需要嘅唔係去邊度旅行，而係1個，確確實實嘅「飛行模式」。