網民數算香港人出國旅行失禮5大行為 竟全數發生在日本
近日在Facebook群組「HK Express香港快運及旅行資訊關注組（討論/分享/苦主投稿）」中，發起「一人一件出國旅行『見過』最失禮嘅事」討論，結果引來近200討論，更歸納出5大共鳴，指「去旅行最驚遇到香港人」。
1.講嘢好大聲
網民指香港人「講嘢真係好大聲」，留言稱「我試過喺siem reap嘅一間cafe內，當全場安靜無比嘅時候，突然有班香港人興奮走入黎，打破寧靜。過左幾分鐘，真係頂佢地唔順，唯有好有禮貌咁話比佢地知之前其實大家都好安靜」、「兩名中年港女係日本長途巴士上高聲量吹水，巴士司機突然停車，走去佢哋面前用日文叫佢哋收聲。」、「食OMAKASE時有一堆廢老講自己成日都食，當中提到食開900蚊一餐，話呢餐覺得冇咩特別。心諗900蚊一餐咁平真係唔好拎出嚟講啦。席間仲有個阿嬸話唔食得生野，叫主廚幫佢整熟哂Ｄ魚佢，咁又做咩入嚟食呢，真心反白眼。成班人講野又勁大聲，超失禮。」。
2.浸溫泉極度無禮
網民指自己親身見過港人在溫泉做出令人目定口呆的行為，指「香港人浸溫泉喺水裡面扭毛巾」、「日本溫泉酒店公眾池，有位香港人放條毛巾落水度，然後特條毛巾捽佢個敏感部位，再放落水度，叫佢唔好咁做，佢仲話『我鐘意』」。
不過有網民則反駁，指「我喺北海道浸溫泉都見啲日本人都係扭毛巾敷面，唔得？」，網民即解釋指「池外，點扭都冇問題，問題係喺池裡面扭或企喺度扭將水流入池內」。
3.無理要求空姐Upgrade座位
「見人坐最尾位話女朋友肚痛，叫空中服務員要求坐頭等或商務位，又話暈又話嘔好辛苦，又話熱水又話要特別照顧，最後空中服務員問是否通知機師，要求落機睇醫生，因準備起飛，跟著又話無事」。
4.買嘢嫌三嫌四
「買嘢諸多挑剔左揀右揀，到最後玩完嘢乜嘢都唔買就咁走人，我喺日本見過好多次，我其中兩次去日本就係同呢D人一齊去，我頂唔順」、「呢D人有D次次起碼玩個店員半個鐘以上，最後乜都唔買就咁走人一句すみません/Sorry都無，去日本人嘅論壇度睇吓人哋點講香港人，好多日本人都對香港人呢種行為好不滿」、「一對年輕港人情侣在福岡市中心的 sushiro, 用英文鬧職員點解要等咁耐同埋點解無英文廣播」。
5.搭車大聲播片
「試過搭車有兩條港女大大聲播普通話抖音片，全車逼住聽」、「佢哋好似唔知巴士都要保持安靜咁，仲要睇戰爭片，係咁播爆炸聲」。
網民：日本人做就得？
不過亦有網民留言反駁，指「日本人做同一件事就無問題？」、「我見過日本人做同一件事，但又無香港人鬧佢哋嘅？」、「日本人都唔見得好安靜同老實」、「唔係全部香港人都咁失禮嘅，不過有一部分真係好討厭，影衰香港。」、「其實韓國人都好大聲」、「日本人都好鍾意打尖，仲要咳同打乞嗤都唔揞口」。
