原文獲 貪玩空少安德魯 授權刊登
上飛機唔可以執輸，食到盡攞到盡
香港人最叻就係唔執輸，行要行最快，嘢飲要攞最多，嘢食都要兩個。嗰啲 upgrade客，好似前世冇飲過cappuccino同綠茶，杯杯都打孖嚟飲，攞住個menu，唔識讀個英文字，就 「 I want this one this one and this one」，可以勁厚顏無恥咁大聲話：「我要試晒menu上所有飲品！」講真，你有咁多把口咩？
識兩句英文嘅，第一句一定係：「One more？！」我肯定見過有個男人，一開波就要兩個餐，仲要打包埋人哋攞來飲果汁嘅膠杯仔，「老婆呀，呢隻杯真係好好呀，攞多幾隻落咗機有得用。」都係嗰句，只要唔執輸就可以，飲要飲到盡，食要食到盡，攞都要攞到盡。
「仲有呀，大家記住食啲杯麵呀，真係好好好好好食呀！」其實，你前世冇食過杯麵嗎？
掃街兼喺條街講嘢大大聲
以為落咗地，可以畀我唞下，屌，又係香港人。其實，好容易就睇得出，邊個係香港人。去日本呢，就係嗰啲著住對New Balance，背住個牛龜咁大嘅NIKE爬山背囊，然後攞住啲嘢食，一路行一路食，十居其九都係香港人，香港人掃慣街嘛！如果個個人喺條街大大聲講嘢，肯定嗰個一定係香港人。
喺日本車廂入面講電話，攞住戰利品去Starbucks霸位
「咁老遠都撞到香港人。」香港人鍾意去旅行嘅時候走入忘我境界，以為廣東話冇人明，以為行街shopping冇人認得出，於是又會做好多匪夷所思嘅行為，令人好難理解。
明明日本嘅車廂好靜，每次我聽到人大聲講嘢嘅，都係香港人，喺車廂攞住啲嘢食到好大聲嘅，又係香港人，攞住十鳩幾袋戰利品，去Starbucks度霸晒人哋啲位嘅，亦係香港人。仲有，煩請你哋打電話真係唔好喺車廂入面打，真係大聲到隔籬車廂都聽到。
講廣東話以為冇人聽得明，對人評頭品足
香港人以為自己講廣東話就冇人明，香港人覺得自己識兩句英文就好叻、好高尚，please，你啲英文真係fluent至好講，唔好唔鹹唔淡就講，笑死人。我聽過無數次香港人對其他人評頭品足，又話人哋著衫唔好睇，又習慣大大聲喺食嘢嘅地方，評論啲嘢食好唔好食。又見過嗰啲去grad trip嘅小朋友，當咗自己去日本玩camp，屌，尊重下人尊重下自己好唔好？