今日同日本同事食飯時，大家都不約而同地講起，被投訴的經歷。經過一番「小圈子選舉」後，香港人投訴 事件以大比數拋離強國，成功奪冠！
原文、圖片授權轉載：Made in Japan
根據他們的分析，投訴方法大概分為三種：
01 | 老貓燒鬚型－－以為大聲就有道理！
開頭明明係自己錯咗先，初頭攞晒威，到中段意識到自己柒咗，就大聲夾惡咁嗌投訴，以便遮醜！
02 | 乘虛而入型－－目的：搵着數！
今次真係對方做錯事，然後趁機會投訴，但實情真正目的係想搵着數！根據員工意見，覺得頭兩種尚算容易拆解，可以使用：四兩撥千斤，又或者雞髀打人牙骹軟，再加上三幾年功力，即可藥到病除。
03 | 金手指－－笑裏藏刀狂投訴
正所謂，明槍而擋，暗箭難防。㗎仔們最怕就係港人使出必殺技，一陽指的師傅 － 金手指！顧名思義，當被投訴者做錯的時候，初時會表現得毫不介意，大大方方，仲會報以體諒的微笑。微笑過後，一個轉身就亮出金手指，務求將你背脊篤到體無完膚，搖搖欲墜為止。
此招最狠毒之處，莫過於令被投訴者「冇仇報」。一日幾十個客，任憑閣下記憶力再高，都難以追查。大海茫茫，問你點報仇！
04 | 港客投訴新招：遲到因為「離機場太遠」
我本身抱着食花生的心態，睇住這班江湖經驗尚淺的㗎妹束手無策。但今日之事，令我有三十年修行都嚇一跳！香港客還車遲到藉口多，就同牛歡喜一定要配鹹酸菜一樣，是不變定律！但今次呢個香港客投訴商舖「離機場太遠」！
諗落又好有道理喎，但你話有咩理由，攞車又係呢個位，還車又喺番同一個位咁冇新意。計我話應該立即執咗呢間舖，搬到機場海關入口旁邊。客人還車時，我哋立即再執咗間舖，做到顧客為本，搬去貴客酒店樓下，再專人上門做埋還車手續。至於入油少少錢就咪斤斤計較，隨便有兩滴看似黃色嘅嘢喺油缸咪算囉。咁大間公司都唔識做生意！小弟話晒香港人，點都撐香港人㗎！ #曲線要講明
更多沖繩租車及玩樂資訊：Made in Japan
下一頁：航空熱話－－「 離譜港客」 4 宗罪，牙尖嘴利恐怖過陸客！
