好多人都唔太滿意自己出生嘅地方，甚至會崇韓、崇日、崇洋……
有次一大班朋友食飯，其中一個係台灣人，我哋討論旅行話題，佢都會即時介紹好多台灣景點、美食、餐廳……
香港人唔鍾意香港
但當呢位台灣朋友問：「香港有乜玩啊？」
大部分人都只會有以下幾個答案。
「其實香港冇乜好玩……」「夜景又唔算太靚。」「購物囉！不過好多大陸人。」「山頂冇乜嘢睇。」「啲嘢食冇咩好食。」
香港真係咁差咩？當去過唔同國家旅行，細心對比一下，原來香港各方面都優勝過其他國家。
機場、夜景，通通都享譽國際
首先講講機場，唔單止喺亞洲區，香港作為一個城市，機場已經靚過好多國家，機場環境夠乾淨，設施齊全，指示都好清晰，即使個機場咁大，都唔會令你迷路。
再講，我哋香港人只需要出尖沙咀碼頭，就見到一個繁榮都市嘅夜景，遠少少唔使一個鐘車程，就可以上山頂從另一個角度俯瞰香港夜景。可能係太方便、太容易就見到，所以好多香港人都唔覺香港夜景有咩特別，亦唔明白點解外國人可以搭船過海時瘋狂影相。原因係，香港夜景真係好靚，冇幾多個國家可以有香港夜景咁靚。
美食多，交通又方便
香港飲食出名多元化，雖然做唔足100%道地風味，但好多都似模似樣，相比起你去台灣食泰國菜，去日本食點心，香港真係做得好出色，所以大部分外國人對香港嘅茶樓點心非常鍾情。
對於一個遊客嚟講，交通方便非常重要，喺香港就算唔識搭巴士小巴，港鐵已經非常方便，幾乎所有景點都可以靠港鐵去晒。更重要嘅係，港鐵指示牌非常方便，車廂亦好乾淨衛生。相比起法國嘅地鐵，你聞唔到有尿味已經覺得好乾淨。
香港污糟？比起其他國家已經很乾淨了
講起衛生情況，美國街頭其實仲多垃圾過女人街，香港商場嘅廁所亦普遍乾淨，起碼唔使收費，亦唔會好似大陸某啲公廁咁，廁格連門都冇，你運勁屙緊屎，有人行入嚟廁所你眼望我眼，都幾尷尬。
香港人，試試愛上香港吧
講咗咁耐，其實都係想各位，可以用心去欣賞下、鍾意下自己嘅屋企－－香港，雖然仲有好多可以改善嘅地方，但未至於一文不值，有好多地方，香港已經比起大部分國家優勝好多。