「大陸嘢！小心食死人啊！」「Made in China，買件衫都會爆炸㗎！」
呢啲言論，相信大家一定聽唔少，不過口裡說不，身體卻很誠實。我發現雖然大家睇落好唔鍾意大陸，但實際上有好多人都有買大陸產品、返大陸玩。
最緊要夠平，抄襲根本唔重要
先睇啱啱過咗嘅「雙十一」，好多平日死都唔會上淘寶嘅人都會破功，因為實在太平太優惠！而好多香港公司亦睇準呢一日嘅商機，推出一系列嘅減價。
正如每次我經過抄襲無印良品嘅「名創優品」，裡面都一樣塞滿客人，好多人都覺得最緊要價錢平，係咪抄襲根本唔重要。
愈來愈多人返大陸飲飲食食
飲食方面，大家又會唔會堅守到呢條線呢？開始有YouTubers 或bloggers介紹「大陸文青cafés」「大陸平飲平食推介」「乜茶必試」嚟吸引觀眾。
起初我都唔敢相信，以為係大陸人假扮嘅香港YouTubers或bloggers！因為有次我唔小心寫咗一個大陸詞彙，就被網民鬧到飛天。
大陸文青cafés？！香港人點會接受得到簡體字啊！但事實上，呢類介紹的確有大批觀眾支持，真係好奇怪。
當然，對於娛樂，每個人都可以有自己嘅選擇，冇話邊個先係正確，可能鬧made in China會爆炸嘅人，根本唔會入名創優品，雙十一會瘋狂掃貨嘅人，都唔會鬧人用簡體字。
未來大陸店進軍香港 小店難續命……
倒不如理性分析下點解咁多人鍾意返大陸吃喝玩樂？我自己食過一次香港嘅「海底撈」火鍋。
我覺得佢嘅辣湯底的確唔錯，但未有令我「再去」嘅意慾。不過最令我深刻嘅係服務態度，尤其喺香港嚟講，佢嘅服務真係好好，朋友話喺大陸嘅海底撈，服務態度會更加好。
未來一定會愈來愈多大陸商舖進佔香港，如喜茶、海底撈、小米、名創優品。
香港一向嘅賣點都唔係服務，當大陸店舖進駐香港，佢哋畀得起香港租金，一定會令更多香港小店關門大吉……
