之前講過喺飛行嘅途中，有一班可愛嘅中國大媽企喺飛機門前排隊，細問先知道，原來佢哋誤會機門係廁所嘅門口。點知今班長途機發生嘅小插曲，令到半醒時分嘅我「躺著也中槍」！
誤認「機組人員休息室」係廁所，叔叔大吵大鬧…..
咁話說有啲用作長途航班嘅飛機係會設有「機組人員休息室」，喺十幾個鐘嘅航程入面，令我哋可以輪流休息「叉叉電」，而休息室通常都會位於機艙後半部，佢又喺廁所隔籬，所以好多乘客都會誤會咗係廁所嚟。
十五個鐘嘅航程加上只有半滿嘅客艙，大家都可以有六小時嘅休息時間，瞓到中途，人有三急就嗱嗱聲仆落去廁所，點知一開門就見到坐我服務嗰邊嘅香港叔叔。
叔叔：「吓！係你啊？搞錯啊！你喺入面搞咩啊？偷懶瞓覺啊？我等咗十五分鐘你都唔出嚟？你好離譜喎！我真係要搵你經理投訴你啊！」
我：「嗯！先生係咪有咩誤會？點解你要等我出嚟嘅？」
空少躺著中槍！
叔叔：「你咩態度啊，吓？你喺廁所搞咁耐，仲好意思問我？」
我：「Emmmm……呢個唔係廁所，廁所喺嗰邊，呢個係休息室，我真係喺度休息緊嘅。」
叔叔：「搞錯？啲指示牌都唔清晰嘅，離晒譜！」
被佢嘈一嘈，我個人醒晒，然後我真心好想同佢講，休息室門口大大隻字寫住「機員專用」「CREW USE ONLY」同埋廁所都有好大張貼紙「洗手間」！
不過佢等咗咁耐，我再解釋，我怕佢會瀨出嚟，今次真係躺著也中槍！