單身去外地旅行想撞下有冇艷遇，談一場浪漫嘅異地戀愛？其實夜蒲都係一個識人嘅好機會。不過各地都有唔同嘅潛規則，喺英國、德國、台灣、北京同韓國夜蒲點先啱？睇睇 ViuTV 《Trip精》請來遊歷多國的時裝設計師 Ivan 分享！
01 | 英國 ： 蒲都蒲得classy啲
印象中，英國人平日都會著得比較formal啲，不過原來佢哋去蒲都會著得好 formal ！點解？因為佢哋習慣去蒲之前同朋友先去啲高級餐廳或者酒吧 pre-drink，自然要著得靚啲。所以下次喺英國夜蒲，記得要執正啲喇！
02 | 德國 ： 狂野開放 提供床鋪「就地正法」
喺德國想去蒲，就要做好心理準備喇！Ivan 表示雖然未有親身到訪，但他的朋友就指部分德國夜店內有床鋪及房間供應，男男女女亦比較開放，不介意在眾目睽睽下「就地正法」，如同 sex party 一樣，令人大開眼界。
03 | 台灣 ： 旁若無人 玩得最癲
去台灣 clubbing 就最輕鬆自在，可以著得好casual，T-shirt 波衫都冇問題。著得舒服自然可以玩得癲啲，high 起嚟甚至會趁燈光昏暗時，旁若無人上演真人show。
04 | 北京 ：《 Trip精》驚喜推介 外國DJ打碟氣氛好
原來近近哋飛北京都係夜蒲好選擇，時裝設計師Ivan就推介北京工人體育館附近一帶嘅酒吧同夜店，地方夠大夠靚之餘，DJ音樂都有水準，唔會播「小蘋果」同「電音版喜歡你」，可以放心去蒲。
05 | 韓國夜蒲 : Oppa最愛掉紙巾
去韓國clubbing嘅一大特色就係迫，好迫，迫到人貼人。另外仲會成日見到人掉紙巾，其實係咩意思呢？掉紙巾表示自己有錢可以嘥，係炫富嘅一種表現，不過就真係唔太環保喇！
另外，喺韓國clubbing 會發現oppa 們都會比較進取主動，好多時會主動作出身體接觸。萬一想拒絕又應該點做？只要表示自己唔係韓國人而且唔識韓文，大部分 oppa 就會知難而退。
