果然係出名多電車痴漢嘅埼京線，咁耐冇搭，一搭就被我碰到恐怖事。仲要埼京線近排實施咗痴漢對策，望上去已經有兩部CCTV，所以心諗應該有改善喇啩？點知……
文章授權轉載：惠依子・日本Office Ladyの日常
車廂擁擠 乘客身貼身
事緣係當日喺板橋上車，但係當日因為有花火大會，所以異常多人搭車。亦都係因為咁，我同身邊一個女仔都冇上車嘅打算，但被人推咗上車，仲要同其他人唔同，唔係面向車門。惠依子好好彩，面前係一對情侶面對面企，所以我面向一位男人背脊企。但係我右手邊位女仔就同一個紋身漢面對面。
距離逐漸接近 行為愈來愈過分
初頭以為佢哋係一對情侶所以面對面企，點知見到個男人擰塊面向個女仔就嚟錫落去，而個女仔就即刻擰向我呢邊避。到咗下個站之後，明明身後嘅乘客走咗有位行向後，但係個男人都唔郁，仲見佢提起膝頭將隻腳貼向個女仔！
旁人出手相救 電車痴漢惱羞成怒
可能我定眼望咗好耐研究咩事被個女仔發現咗，所以佢都定眼望住我，以困惑嘅樣向我求救。我趁個男人擰開面，用口形問個女仔係咪識個男人，佢向我擰頭。我即時捉佢過嚟我身邊等佢唔使面向個男人。之後都一直望實佢有冇奇怪舉動，怕佢搞個女仔，當中仲對望咗好多次(其實好熬底佢會襲擊我哋)。
之後佢仲要惱羞成怒，向其他人話：「望咩呀？我有錯咩？吓？」但係冇人會答佢，都冇人望佢一眼，扮唔知咩事。
落車後未驚完 擔心被跟蹤或復仇
之後我哋三個都喺同一個站落車，目擊到個男人冇再搞個女仔先離開。個女仔都有向我點頭道謝。之後由車站去搵朋友期間都好驚，好擔心嗰個人會復仇。
其實好多時話啲人會揀啲唔敢反抗嘅女仔都係幾真，今次個女仔一睇就知係好靜唔講嘢嘅人，連向我求救都係用眼神。不過從今次嘅經驗可以知道，迫到咁其實有CCTV都冇用，真係要靠自己或者身邊嘅人，先可以防止呢啲賤痴漢。
(抱歉今次打咗超長文。)
文章授權轉載：惠依子・日本Office Ladyの日常
下一頁：日本痴漢奇遇記 | 伊豆海灘遇怪男 公然自瀆！
