人無恥就無敵
好多歐美住客都喜歡先寫封信和酒店溝通，當中有些真的有需要，譬如生日、結婚周年，想給另一半驚喜，又或者有些特別需要，比如坐輪椅的人士，選擇住在電梯附近的房間。不過亦有好多，不分國籍，全天候行使酒店住客權利的人。
講真，要R，來來去去都係嗰啲，不外乎upgrade房間/ 免費早餐／高樓層/club access，送多個果盤畀你值得幾多錢！如果你覺得咁樣就有賺，我認為你不太了解酒店的運作。
對於五星酒店，幾兜花生值得幾多錢！有房嘅話，upgrade你係人情，唔畀你係道理，好聽啲講做hospitality大家開心，你畀個好評酒店就win win。但如果你搲爛塊面，衰啲講就當畀乞兒。
職員一睇Email就知龍與鳳
談心？講真，普通酒店operation職員一睇你個電郵，已經知道你是龍是鳳。R嘢其實唔使用談心來包裝，冇人想同你談心，酒店都是商業機構，一買一賣，其實合情合理。
如果用網上好評來換upgrade，另一方覺得OK嘅，咪upgrade你囉！其實使乜出攻略？中英文好少少嘅人都可以寫得出一封情理兼備嘅電郵，講明自己想要啲乜嘢，只不過寫一份攻略來「炫耀」，只會令人覺得你純粹cheap精R嘢。
最搞笑係佢後來仲面皮超厚地話：
著數呢啲嘢週圍都有，其實睇你主唔主動去做。我出呢個post前都估到一定有人話我貪小便宜等，我唔介意人哋話我，我創立酒店控專頁的目的就係結合自己住酒店的經驗及訂酒店技巧教授給各朋友！等佢地可以享受到低成本旅遊，高質素享受。如果網友覺得咁樣談心搲著數唔啱，佢地大可以睇完就算。每個人的道德標準都唔同，我只係在自己的標準上主動尋求最大的利益。
酒店人員爆料：其實最衰係業界人士！
我有酒店朋友就跟我說，最衰的客人，通常他們都是在業界的人士，比如做公關、搞活動，或者稍為了解酒店運作的人，知道遊戲規則點玩。寫一封電郵之後，如果不是二十四小時之內回覆，那麼就有痛腳在手，會馬上發爛渣，並且要求跟總經理對話，甚至直接傳電郵給總經理。
總經理通常覺得自己有少少錯在先，未能夠二十四小時之內回覆客人，所以都會息事寧人，大事化小。如果唔係太離譜的要求都會滿足，酒店朋友通常都會覺得十分氣憤，不過又無可奈何。
一講到R嘢，酒店業界朋友就非常踴躍報料，大部分都與傳媒和KOL有關，以下case都相當搞笑，同大家分享一下（如有雷同，實屬巧合）。
「有位英國記者覺得自己好有型，經常寫一些勁flirty e-mail，幾次都寫過500字的電郵，目的跟我打關係，R廣告食飯吹水兼媾女，真係好鬼煩兼嘔心。」
「嗰個food blogger食完個漢堡包未落格，已經話未試過另外一間餐廳，擺明R飯食。」
「明明話請嗰個5,000 followers的blogger食飯，佢又死要帶埋另外一個（素人）朋友，話慶祝生日，唔單止要求免費飯，仲要免切餅費，真係cheap到宇宙盡頭。」
真正貴客不用寫電郵
其實講到底，真正的貴賓，根本不會自己訂酒店兼 send e-mail，他們多數透過秘書或者agent訂酒店，甚至在酒店的系統內已經有他們的資料，見到他們的名字已經會自動安排一切他們喜歡的東西，這種我話你知我係邊個、我今日生日喎、我好友善你畀間靚房我的電郵，真正的貴客根本唔需要做呢啲粗重工夫，使乜又要學埋韓文「God bless you」先至得嗰兩個果盤。
