撰文：CY｜資料來源：事主授權轉載｜圖片來源：unsplash
酒店職員洩憤打爛車尾燈 酒店欲抵賴反遭醒目住客識破
GOtrip編輯向網民了解事件經過。網民表示，早年與友人前往泰國華欣旅遊，自行駕車前往酒店，並打算將車輛停泊在酒店免費停車場內，卻被告知酒店車位已滿，需要自費停泊在20分鐘步行距離外的停車場。網民友人立刻向該職員表示「見到酒店門口仲有個車位」，卻被告知該車位為傷殘人士專用車位，其後雙方發生爭執。該員工最終讓步，容許網民車輛停泊於該車位。
車尾燈被毀 要求查CCTV卻被辱：畀咩價錢就有咩服務
未料第二日前往停車場時，發現租用車輛的車尾燈被打破。網民表示：「當然就係即刻同酒店反映啦！（不過）佢哋唔認話係酒店問題，仲話番我哋轉頭，話係我哋自己整爛屈佢哋。」
當時酒店總經理得知事件後出面回應。「但竟然夠膽死同我講話佢已經睇咗CCTV，肯定唔係酒店嘅問題，亦唔會同唔需要提供CCTV畀我哋睇，仲話你畀得咩價錢就係有啲乜嘢嘅服務。」
醒目網民錄音做證據 總經理秒速改口道歉認錯
幸好，網民友人當時醒目用手機錄下所有對話，並藉此要求酒店總經理公開事發當時的CCTV片段。如繼續拒絕要求，則會要求當地警方調查，並將該段錄音傳送至該酒店集團的總辦事處。
網民稱酒店總經理得悉後，「即時啞咗，面紅紅咁，好嬲但又唔敢再駁。」並承認員工打爛車尾燈事件屬實，「更寫番道歉信畀我哋，同埋即刻幫我哋搞保險嘅嘢。」
酒店總經理在過程中多次婉轉要求「我哋（對外要）講話係個人責任整爛」。網民亦相當醒目地回應：「其實我係知我個車保係cover呢樣嘢，保險嘅嘢我哋會handle番。」酒店總經理聽到後，「即刻嬲到塊面紅晒，但仲要笑住咁對住我哋。」
網民：有道理就應爭取到底
網民向GOtrip編輯強調分享經歷並非「翻舊帳」。她在帖文中亦有清楚註明，當時酒店總經理為息事寧人，提出可以免一晚酒店費用，不過她與友人都沒有接受。「我唔會搵佢著數，但我都唔會被佢蝦到上頭頂都唔出聲。」
至於為何事隔多年仍要分享經歷，她表示，希望透過親身經歷讓大家了解爭取權益的重要性。「有時啲嘢明明道理係喺自己嗰邊，（就應該）用正確嘅途徑去投訴同爭取。」不應抱持多一事不如少一事的心態，白白蒙受損失。
網民酒店入住經歷帖文內容
想分享返一個個人經歷，關於消費者應該得到咩嘢嘅服務。
話說我之前去旅行，試過畀人整爛咗個車尾燈，從玻璃碎散落方向睇黎係畀人惡意整爛。
事發前一晚有因為車位問題，我朋友同Front desk嘅Staff爭論過幾句，結果第二日去攞車時就發現車尾燈爛左。
當然就係即刻同酒店反映啦！
佢哋唔認話係酒店問題，仲話返我哋轉頭，話係我哋自己整爛屈佢哋。
即時我哋問佢哋睇左CCTV未，佢答未，話之後會覆返我哋。
之後間酒店個General Manager就出場喇！
但竟然夠膽死同我講話佢已經睇左CCTV，肯定唔係酒店既問題，亦唔會同唔需要提供CCTV畀我哋睇返，
仲話你畀得咩錢就係有啲咩嘢嘅服務（話說嗰間係國際知名品牌其下既Economy Hotel）
勢估唔到原來我朋友係一路錄緊佢音。
我哋嘅反應係如果佢唔畀我哋睇既話，
我哋會即刻報警同埋send段錄音畀佢global office投訴佢先肯認，寫返道歉信畀我哋同埋即係幫我哋搞保險嘅嘢。
（其實我係一路都知道如果我哋同車公司講話係個人問題整爛左，保險係cover嘅，我哋一蚊都唔洗賠）
當然，General Manager同我講返同一翻說話
再婉轉甘要求我哋講話係個人責任整爛
當時我笑笑口同佢講：「其實我喺知我個車保係cover依樣嘢，保險嘅嘢我哋會handle返」
佢即時嬲到塊面紅哂，但仲要笑住咁對住我哋
仲要同我哋講佢知香港打風，我哋都返唔到去，佢可以free一晚房畀我哋（我哋係冇accept佢呢個offer）
問心一句，個人既觀感係，其實好多勢利外國人都會蝦亞洲人
有時啲野明明道理係喺自己嗰邊，用正確嘅途徑去投訴同爭取囉
我唔會搵佢著數，但我都唔會畀佢蝦到上頭頂都唔出聲
