要比較香港兩大樂園：迪士尼同海洋公園，機動遊戲各有千秋，海洋公園挑戰心臟強度，迪士尼着重歡樂氣氛。
遊迪士尼遊客傳統 戴卡通角色帽
海洋公園有動物睇又有海洋館，先不討論海洋公園喺保育方面做得足唔足夠。而迪士尼就有兩隻腳行嘅老鼠、鴨同狗周街行……
不過有樣嘢，迪士尼一定多過海洋公園，就係客人會戴卡通角色帽。
好多人入到迪士尼，第一時間會經過美國大街，買一頂自己鍾意嘅卡通人物帽，戴住玩足全日。
滿足女友 被迫戴三眼仔帽
女朋友由第一次入迪士尼公園已經忠於呢個傳統，仲迫我買多頂嚟戴……
當年我心諗，大佬啊……男人老狗要我戴卡通帽？！咪玩啦！當時女朋友仲要拎起一頂三眼仔嘅帽，佢話好襯我……
不過咁，最後我都係買咗呢頂三眼仔帽嚟戴，當氹女朋友開心。
東京迪士尼 戴帽融入童話世界
只不過，噩夢開始了！有幾次排隊玩機動遊戲時，我聽見後面有人指住我個頭細聲講，大聲笑……「嘻嘻～條友咁大個人仲戴三眼仔喎～」
我第一次戴三眼仔帽被人笑，覺得自己係異類。
但之後我同女朋友去東京迪士尼，發現原來個個日本人入場都幾乎會戴住頂帽。全情投入成個樂園氣氛，冇人會恥笑戴公仔帽嘅人幼稚！
另類好處 嚇退打尖客
不過咁，喺香港戴住頂帽都有唔少好處，有次排隊有個大媽想打尖，鬼鬼祟祟衝上前，我一手搭住佢膊頭，用親切嘅語氣同佢講：「排隊吖唔該！」
呢位打尖大媽一擰轉頭，就見到我目露兇光，頭戴三眼仔帽，加埋五隻眼咁啤住佢，佢就知難而退，行番去後面排隊……
工作人員維持秩序 阻止打尖情況
講咗咁耐迪士尼，海洋公園都有值得讚嘅地方。雖然好多人覺得主題樂園已經被大陸旅客搞到淪陷，地方冇以前咁乾淨，餐廳附近周地垃圾。
但海洋公園嘅工作人員，每當見到打尖情況發生，都會幫忙喝止，睇得出佢哋好用心想大家遵守規則。
其實生活壓力咁大，入到樂園，大家都會放低成熟，用半日時間，畀自己幼稚一下。愈在意旁人目光，就愈難得到快樂。
回想起自己細個，何嘗唔係買咗把激光劍，插住喺條褲度大搖大擺行出街，扮武士玩足全日？
呢份珍貴童真難得喺樂園可以搵得番，或者笑人幼稚嗰個，其實先係最幼稚。
延伸閱讀： 知唔知全世界咩人最唔鍾意香港？就係香港人
