上集 農夫 玩轉倫敦鬧市，今集回歸校園乖乖做學生，不過晨早4點已被叫去游早水訓練，之後仲要划艇同野外求生，再一次「玩人變做被人玩」！最誇張是被監製擺上枱，要上台向全校師生演說，佢哋都話：「緊張過出show呀！」
01| 世界級特訓 未瞓醒就要游早水
Mouny Kelly College係運動名校，尤其游水最出色！農夫今集就一大清早被拉去「游早水」，跟隨「世界級」泳隊練習，熱身運動後，二人已經大叫吃不消！C君因為唔識游水，所以集訓重任就交畀陸永。陸永能否跟得上泳隊節奏？佢練完話：「嚟留學，麻煩操弗個body先！」
02| 寄宿食堂 誇張早餐
運動過後，二子品嘗英式豐富早餐，誇張程度令C君都話：「喺香港，應該要$200先食到！」但進食時又發揮搞笑本色，又「口花花撩女仔」，轉眼又感性地發表幸福感言……
03| 划艇訓練 農夫互數不是
英國盛行划艇運動，農夫揚言跟「扒龍舟」大同小異，懶叻扮醒仲教一班同學仔大唱龍船歌！不過講就得戚，落場時就真係麻麻了！C君投訴陸永與隊友划槳節奏「未齊過」，陸永卻反指C君划槳蜻蜓點水「扮用力」，究竟誰是誰非？
04 | 港式英語 上台演講嚇到面青
面對上台演講，佢哋兩個就真係嚇到面青青，因為要喺禮堂面對所有同學，仲要全場講英文，而且演講內容超正經。佢哋用港式英語玩「唱雙簧棟篤笑」，同學仔唔止聽得明，仲搞笑成功全場拍掌大笑，認真厲害！
05| 軍服野戰 血腥求生記
農夫換上迷彩制服隨隊向山上進發，陸永話自己似「劉大衛」，C君更話自己係天生軍人，因為佢本名係「鄭斯君……人」。辛苦行到小屋舉行營火會，教練竟然即刻教大家「處理」野兔，畫面血腥睇到佢哋兩個差啲反白眼！初嘗兔肉，二子何故大受刺激，要跟「同學仔」立下「兄弟宣言」？
Five Thunder Strike on your head！
