寄宿名校大起底 Mount Kelly College
成立於1877年，位於英國西南部小鎮Tavistock，校舍外形莊嚴傳統，而且鄰近達特摩國家公園，所以同學仔經常都可以親親大自然。學校注重學生多元發展，課外活動超豐富，尤其游水最出色，除了被Telegraph評為「英國10大最好的Boarding School」，更稱得上是英國游泳隊的選手搖籃，現時英國代表隊選手Daniah Hagul便是該校year 12學生！
笑位 01 | 探訪女生宿舍
二人去到宿舍，簡單認識環境後，向同學仔提出第一個要求，竟然係「探訪女生宿舍」！
C君主動開口查問：「女生宿舍在哪兒？」
笑位 02 | 惡搞校服部職員，厚顏扮劉華
第二站去校服部揀校服，原來寄宿學校不同課堂都有不同服裝，二人揀衫之前不忘調戲女職員，一個自稱劉華、一個話自己係Jackie Chan，人哋都冇佢哋咁好氣！
一口氣試足 6 款造型，在日後的幾集入面都會陸續登場（蘇格蘭裙除外）！
笑位 03 | 蒙眼美術堂 畫畫變嗌交
究竟在英國上堂，同香港有咩分別呢？農夫試完話畀大家聽，真係好大分別！就以美術堂為例，香港注重藝術技巧的訓練，在Mount Kelly College反而會同大家玩蒙眼畫畫，鍛鍊團隊精神，實在太有創意！陸永C君話晒都組團農夫超過15年，以為一定難唔倒佢哋，點知真係出晒事！事關陸永搞笑癮發作，C君完全唔明指令，最終當然係鬼畫符啦！
不過陸永指令勁好笑：「哇！你畫得好好呀！隻貓畫到好似狗咁；隔籬仲有個花樽，點解你畫到寶礦力咁？」最後令C君畫到扯晒火，連老師都出馬叫佢正經啲！最後？兩幅畫當然都一塌糊塗，又迫老師將「畢加索」名畫貼堂，結果只係得到老師評價F級，理由係「睇唔到合作精神」！
笑位 04| 數學&拉丁文 口花花收買老師
去留學，當然都要了解下當地的讀書課程！農夫兩子就嘗試上全英數學堂同拉丁文堂，面對小學雞Maths就當然難唔倒佢哋，C君話最難適應其實係全英文教學！
陸永本身數學唔好，估唔到小學算術堂都一塌糊塗，最難原來係open-ended question！計完一輪原來老師話「過程最重要」，令到陸永唔知好嬲定好笑！
上拉丁文時，C君就率先問同學仔「靚仔」「靚女」點讀，老師一入場就即口花花讚老師，原來係策略，等老師唔好為難佢哋，厲害！上堂時C君更成功憑小聰明估到拉丁文中「octō」是代表數字「8」，老師都不禁要畀個「叻」佢！
笑位 05| 花絮篇－－雀局會友 宿舍「文化交流」
農夫坐咗勁耐車終於去到學校，一落車立即去宿舍，以為想休息？錯！係打麻將，因為要收買人心喎！農夫在節目中懶醒畀貼士，話同學仔如果怕宿舍新朋友難相處，一定要作深文化交流，搞爛gags教廣東話已屬低手表現，反而打麻將最容易融入團體。「麻將邊打邊吹水，打賭贏咗可以叫佢做你手下，好化算。」點知外國朋友仔鬼咁醒目一點就明，即使農夫聚精會神，陸永仲心思思想出蠱惑，可惜都係一句「食糊」慘被KO。不過氣氛超融洽，監製都讚農夫搭訕係有一手，值得學習！
