早幾日熊本地震，大台師奶節目驚死執輸，急急腳派女藝人去災場「送暖」，結果搞到要災民接濟返轉頭，醜盡國際莫過於此。細佬不才，都叫做過幾年記者，睇見聽到肉肉酸酸嘅偽採訪．真八掛，認真不吐不快！自己都做過地震報道，自問絕對明白喺災場又餓又累又腳軟係咩滋味，不過好似嗰位台灣記者咁，拍下歡樂地攞住災場食物的相片就真係太過；完全欠缺對災民的同理心！
以下記述我係災場採訪嘅親身經歷，災難記者真係唔係咁易做！
四川地震親身採訪 準備充足勿成拖累
查實災區之所以為災，正係因為當地已經切斷晒城市人眼中嘅物資供應，仲以為拍緊香港小姐外景特輯嘅大台，點會唔甩轆。當年小弟入行冇耐，遇上四川地震，半夜兩點收到編輯急 call，叫我執定行李，天一光就要飛。尤記得當年老細再三提醒，入災場前兩件大事，一：帶定衛星電話（傳稿傳相用，因為什麼 3G4G SIM 卡，於地震現場只係廢物）；二：準備足夠水同食物（因為入到災場，記者如果自理唔到，不但做唔到野，更變相拖累街坊。）
入災區隨時應變 徒步行隨地瞓
可惜人算不如天算，當記者飛到成都，先知道通去災場嘅路面已經全面倒塌，由市區入到災場，距離足足60公里，喺陸路交通全封之下，記者一行四名壯漢只好頂硬上徒步行；60 公里有幾遠？大概由屯門行去將軍澳再出返觀塘啦，記住沿路窮山惡水、唔會有 7 仔士多；我哋買定嘅食水乾糧，根本冇可以全部孭入災區，只能即時應變，最後決定只能帶每人兩日嘅食物上路，其餘空間同體力就要孭食水同相機！
我地由凌晨3點出發，足足行到傍晚6點先入到災場，沿路試過幾次餘震、又有山泥傾瀉，幾乎同公安武警同步抵達；行咗四、五個鐘，難聽啲講真係已經痾屎都冇力，但全能老細嘅衛星追魂 call 就在此時響起，結果硬住頭皮又再採訪一夜，到搞掂收工，已經係第二朝天光；幾條臭到冤嘅記者佬，隨地執塊紙皮攤住就瞓！嗱，唔係話性別歧視，同場一樣有唔少師姐頂到入災場；之不過好似今次阿大台主持咁，又要入災場又化晒妝怕醜樣，咁就絕對係麻乜煩、多乜魚！
災區採訪心情複雜 仲打卡留念？
講返少少採訪感想，做記者嘅有機會跑呢種可能十年先得一次嘅災難新聞，個心難免緊張；不過一去到災場見到屍橫遍野，心入面又會乸住乸住，點樣喺呢種又緊張又傷痛又累到出汁嘅環境做好採訪，我都唔敢話自己做得好；不過成日提醒自己一點，就係千祈唔好當自己係旅遊記者出嚟遊埠；咁啱得咁橋，當年又係有大台記者喺災區係咁打卡留念，背後畀行家插到飛天，話佢（自以為）似明星多過似記者喎！