講咗十年，終於同到一班死黨去旅行。
是咁的，我唔覺得太過慚愧，我好很肯定你哋一個二個都試過，想約一班三五知己人齊腳齊咁去旅行，係件難過老細叫你聽朝交report嘅事。曾經有一次，我錯過咗一個機會，我幾位好友提議去沙巴，只怪陰差陽錯，啱啱轉工請唔到假，於是佢哋都照去，只欠我一個……
轉眼間又過咗三、四年，再有人話都仲未真正人齊，短短哋去個曼谷都好。好好彩，今次一講，過兩日就confirm晒啲嘢，開開心心等出發。 識咗呢班朋友幾乎15年，從中學到而家都仲keep到大概一個月見一次。
今次旅途當中有點感慨。各朋友都逐漸成為中級管理層，即係老細無時無刻都旨意你跟嘢問你嘢要即刻覆嗰個層次，所以，明明排排下隊等食飯，佢哋都喺度覆公司e-mail。
以前我唔覺得旅行用Wi-Fi蛋好重要，依家終於明咗。呢種情況我知道只會由依家嘅「間中撳電話覆e-mail」變成將來「夜晚返到酒店唔係開麻將枱而係開電腦做嘢」嘅局面。
嗰一刻，我突然後悔三年前點解錯失咗一次一齊去旅行嘅機會。友誼同時間，同樣要珍惜。
同普通朋友去旅行，同最好嘅朋友去旅行，有啲似男朋友同老公嘅分別。普通朋友嘅話，去旅行時有咩摩擦爭拗，大不了疏遠，以後唔見咁多。而最好嘅朋友，就係無論有咩唔開心都好，都會同自己講唔好放喺心上，最多嬲一分鐘啦，嬲一陣好喇。過咗啖氣，如常嘻嘻哈哈。
明明前兩日先落機，我依家就已經有衝動想再去多次。一齊傻笑，低B都唔使就住就住。
