我正身處於意大利旅行，而今次行程令我最深刻，係見識到內地客旅遊遇到的兩地文化差異。
內地遊客掃貨 名牌袋圍餐枱
前兩日，我去咗1間頗多人介紹嘅扒房享用晚餐。鋸扒途中，幾名兩手攞住戰利品嘅中國遊客進入餐廳，當佢哋擺低手上印有名牌logo嘅袋袋，情況就宛如圍城一樣，團團包圍住張餐枱。
正當佢哋研究緊餐牌時，其中1位大媽大概購物時太拼命，臉紅耳赤，一直喘氣不停，於是喚來侍應，手勢英語並用大叫「water，water」。
冇細看餐牌 質問「水都要收錢」
幾分鐘後，侍應拿來1樽礦泉水，大媽以天生蠻力扭開瓶蓋，仰頸豪邁一喝！飲咗幾乎半支，先記起身邊有同行夥伴，於是大媽貼心地將飲剩半支嘅礦泉水斟俾佢哋。
而有趣嘅事就喺佢哋埋單時發生！大媽發現賬單有唔妥就質問侍應，點解樽水要收錢？有冇搞錯？侍應睇嚟英文唔太流利，默默打開餐牌，指俾大媽睇，支水喺餐牌上寫明要收錢，絕冇搞錯。
麵包如茶芥 邊咒罵邊付錢
接着，佢哋開始執着於食到剩番包皮嘅麵包點解要收錢？佢哋明明冇落單。侍應表示每枱都有，係必收費用。如果大家去過意大利都知，佢哋服務態度算不上好好，解釋多幾句，就會流露出唔耐煩嘅表情。所以，意大利侍應同大媽購物團嘅戰況亦漸趨激烈，手舞足蹈，各不相讓。
最後可能語言不通，侍應叫埋經理幫手，大媽自知理虧，雖然不斷咒罵：「操！操！操！」但都肯乖乖俾錢，攞埋所有戰利品離開。
明白文化差異 仍需入鄉隨俗
所以1個人身上穿着幾多名牌，同佢嘅人品係完全冇關係。有句說話叫入鄉隨俗，去到其他國家，就要遵守別人規矩。你可以批評佢呢種文化、習俗唔適合你，但絕對唔能夠用自己準則，喺別人地盤撒野。
但最後不得不提，意大利呢個地方，暫時係我去過嘅國家之中，服務態度最差。當然，呢個只係我個人感覺，差處未算差，世界仲有好多地方我未見識過。讀萬卷書不如行萬里路，去1次旅行，可以見識到好多唔同國家與香港嘅差異。
