空姐心聲：比起大陸人，有時我更加怕香港人⋯⋯
港人難頂行為｜01 霸行李架
個排咁啱白桃盛產嘅季節，某幾班日本返香港嘅班機都坐滿香港人，座無虛席。當我正忙住關行李櫃時，坐喺前面嘅女士突然大叫：「喂，小心我啲桃，我成箱放喺裡面，唔好畀人放嘢入呢個行李櫃呀！一陣壓爛我啲白桃，你賠返畀我！」
有時我真係唔明，邊個話過個行李櫃係你嘅啫？有位就放架啦！有啲野蠻客仲會叫人搬走個行李畀佢放，seriously？
港人難頂行為｜02自以為高人一等
雖然心裡面係諗：「你呢條死八婆識唔識乜嘢係禮貌，仲有，我唔係叫阿喂，你啲桃咁X矜貴就唔好放上去啦！」但我還是報以一個虛偽的笑容說：「小姐，你要知道行李櫃係共用嘅，其他乘客都有權使用架，boarding 嗰陣我一個人要睇晒成條aisle，實在無法確保你啲桃唔會被壓扁，不如你放喺腳下面自己看管，咁咪安全得多囉！」
「我要放對腳喺前面架，小小事都做唔到，冇鬼用架而家啲空姐。」
我對眼反到上後腦。
港人難頂行為｜03 越南睇騷遇著香港人 全程呻悶要shopping
除咗喺飛機上成日遇到呢啲自視過高嘅香港人外，我都唔鍾意喺外遊時遇到佢哋。
有一次去越南旅行，睇佢哋出名嘅doll show，啱啱有一團香港旅行團坐喺旁邊，成場show佢哋就不停投訴「好悶、好無聊」、「一早唔應該入場」、「去shopping好過」……
香港人就係咁，無論食乜、睇乜都要比較，「我覺得上次嗰啲仲好lorrrr」，永遠覺得自己experience過嘅更好，凡事都要計到盡，畀咗一百蚊就要得到一千蚊嘅享受先叫著數。上飛機要爭窗口位，上旅遊巴要霸兩個位。
死唔執輸，乜都要搶咗先。
相反，我見到其他外國couples，無論嗰場表演係咪真係咁有趣，佢哋都會全情投入，興致勃勃咁睇完整場表演。
港人難頂行為｜04 MOMA睇展覽 訕笑耍聰明
曾經有一次喺紐約嘅MOMA睇展覽時，我聽到旁邊嘅香港遊客講：「咁樣嘅，我都識畫啦！」
嗰刻我真係想同佢講：「其實你出少句聲，冇人話你啞嘅。」
我自問文化水平唔高，但嗰種連對藝術一份基本尊重都冇嘅人，仲憑乜嘢覺得自己高人一等呢……
其實香港人喺取笑大陸人冇文化時，係咪都應該反省下自身？
網友：做過服務業嘅人先會知其中辛酸！
- 「幫我做個sales，有冇啲香港陀地真係衰過強國人多多聲！有少少學識嗰啲先最PK ！着到身光頸靚，西裝友嗰啲，九成無錢！反而着得最樸素嗰啲先最有錢！」
- 「做過服務業嘅人先會知其中辛酸……日日都係青山Open Day……最憎啲X街闔府統請咁衝入嚟叫你拎嘢食，全場試晒咁滯，突然間有人嗌：媽咪，有位啦！鳥獸散拍拍欏柚去晒隔離食糖水，唔該都冇句」
- （編按：香港服務業人士見到這篇文章後，不能認同更多，紛紛指出自己的經歷。）
網友：香港人劣根性
同時亦有人指出係香港人最根本嘅劣根性：
- 「香港人畀咗錢就要永遠的5星級服務」
- 「最大問題係佢哋覺得自己無問題！！」
- 「去到邊都可能遇到擺架子嘅人，與種族國籍無關，正如禮貌一樣，係人格&修養所致」
- （編按：討論中也帶出，香港人認為畀咗錢就是大爺的認知。）
