揹住個背包，去一場沒有終點站嘅旅行！聽落非常浪漫，無拘無束，就算連行山露營都未試過，單係聽落已經覺得十分有型。

亦有好多人因為呢種對「生活」嘅憧憬，而揹起厚重嘅背包，踏上背包客之旅。以下有幾樣嘢，對一般人而言可能覺得好正常，但背包客見到，真係會感動到喊出嚟。

01 | 冇臭味嘅雪櫃

你屋企個雪櫃就算日日都放隔夜餸，但都唔會有臭味。不過對於住慣 share house 嘅背包客嚟講，一個冇臭味嘅雪櫃簡直係神跡。

各位可以睇下幅圖，其實有空位放自己嘢已經好感恩。多數每間share house，一個雪櫃起碼有８～１０個人用。而背包客因為未必有時間日日買餸，多數一買就買三至四日分量，所以好容易就塞爆雪櫃。再加上，未必每個房客都注重衛生，有時啲肉滴晒血又放入雪櫃，唔小心滴咗少少菜汁又唔清理，久而久之，雪櫃就會愈來愈臭。

02 | 有足夠嘅插頭叉電

呢個情況發生喺外國hostel會比較多，每間住10～12人嘅房，可能只會有兩個插頭，每個房客都可能要叉相機、電話、尿袋、電腦……所以就算開個拖把出嚟，都一樣未必夠用。

所以有時會出現一個好奇特現象，就係半夜會喺大廳或廚房出現幾個背包客企喺度叉電。對於背包客嚟講，半夜瞓住覺幫電話叉電，已經係好奢侈嘅一件事。

03 | 有熱水沖涼

回想起當時喺澳洲膽粗粗揸車環澳，莫講話成世人未試過搭咁耐車，自己揸足五日，幾乎廿四小時都喺車上度過，連續三、四日冇沖涼，連水都要慳住飲，依家諗番起都覺得自己好有毅力。

因為澳洲遠離城市嘅郊區係完全冇街燈，半夜公路除咗有好多大貨車奔馳，仲有好多袋鼠衝出嚟撞你架車。

老老實實，袋鼠真係一種黐線嘅動物，佢哋明明叫袋「鼠」，但就好似隻貓咁，見到你開住車頭燈有光郁來郁去，佢就衝出嚟撞你……為咗唔好有人命及鼠命傷亡，通常天黑就會搵個油站泊低架車休息，等天光再繼續。

一句講晒，點解大家咁鍾意做背包客，或者去旅行呢？

因為對香港人嚟講，「生活時間」實在太珍貴……

喺香港，可能每年加人工、換新電話、食自助餐先滿足到平時被老闆榨壓嘅心靈傷害。但當你成為背包客，生活簡化到工作只係為應付衣、食、住、行所需。原來做人得到嘅嘢愈多，反而更加難感到滿足。