還記得人生第一次旅行的心情嗎？
我人生嘅第一次旅行，奉獻咗畀台北。仲記得當年我得十九歲。同女朋友都係第一次同家人以外嘅人出國。
因為驚趕唔切登機，提早兩個半鐘去機場，搞手續時其實好緊張，但強裝鎮定同扮晒有經驗咁。
仲記得我辦理完登機手續之後，根本唔知要點做……到底喺邊度等飛機起飛？點解周圍都見唔到飛機？
機場指示牌又多，完全不知所措，最後扮晒不經意咁跟住人哋入閘、過海關……
十幾年前的旅行與現在的差異
01 ｜ 預先 print 定行程
以前個個手上都會攞住本俗稱「閃卡」嘅旅遊書，我除咗跟住書上面嘅建議行程去玩，都會上網蒐集晒所有資料。
但由於當年未流行租Wi-Fi蛋，商場或公共場所嘅Wi-Fi設備都未夠完善，
所以，所有資料都一定要喺香港查。
再用影印機print好晒地圖，自己畫定路線，或者用手機cap低。
02 ｜只有地圖在手
仲好記得旅行書嘅地圖極度簡陋，又唔夠update，又冇地鐵出口標示。
去到日本仲慘，街道錯綜複雜，想喺旅遊書搵個地標知道自己位置都難，惟有數住自己由地鐵站出發行咗幾多條街……
而家就唔同晒，通訊發達，每人手執一個Wi-Fi蛋，有咩事就開Google Maps，好多食店或旅遊景點打個名就查到點去，連地鐵班次都有提供埋，唔驚搭錯車。
03 ｜單靠旅行社
十幾年前唔識自己上網訂機票酒店，廉航未盛行，惟有去旅行社參加自由行。而家乜都可以上網搞掂晒，機票酒店車票一手包辦。
最大的分別其實是自己
上面講咗年代通訊科技嘅差別，而十年前後，發現最唔同咗嘅……係我自己。
最近去咗三日兩夜台北旅行，本身預咗純粹食嘢同shopping。回憶番十幾年前嘅滋味……
點知……真係想唔認老都唔得，行到第二日，去咗九份十分，對腳幾乎斷咁滯，立即縮減第三日行程。
另一方面，以前一個夜市可以由街頭食到街尾，依家食完塊雞扒已經飽咗一半，受唔到太過煎炸嘅食物。
頂住個懷胎三個月咁嘅肚腩返到酒店，飲番包「清熱酷」紓解喉嚨，真係叔叔不行了。
嗰一刻，我終於明白，點解老一輩嘅人去旅行鍾意靜態、唔緊密嘅行程……
所以建議各位，趁住後生唔好慳，去盡啲，錢可以再賺，但時間只會流逝，唔會返轉頭。
