相信好多人都有瞓過龍嘅經驗，由於我係一個極度鍾意賴床嘅人，所以平時都會喺電話set定三五七個鬧鐘，每隔三分鐘嘈醒自己，我絕對估唔到我又瞓過龍！係啊！我又喺飛機瞓過龍，今個月第二鑊喇！！！

長途航班 空服員要分批輪流休息

咁之前都講過，長途航班上面，我哋係有法定休息時間嘅，通常係喺兩個餐飲服務中間嘅時間，分開兩組輪流去休息。但有啲航班基於出發時間嘅時段，又或者航程太長，咁就會喺航程中段派第二餐，所以有一半同事就要捱到做完第二餐先有得休息。

準備換睡衣瞓覺 點知聽到機長廣播⋯⋯

而今班機派完第二餐，已經捱咗十個鐘有多，終於有得瞓，仲可以瞓到降落前大半個鐘，set好鬧鐘早十五分鐘起身，換埋睡衣就去瞓。
點知突然聽到機長嘅廣播：
「30 mins to landing。」
得番30分鐘降落，望下部電話，
原來我個時間冇轉番去香港時間，所以個鬧鐘至少十二個鐘之後先會響，嗱嗱聲換番衫衝番落去。

我：「唔好意思，我瞓過龍啊！」
同事A：「我哋傾得太興起，完全冇發覺你未落嚟。」
同事B：「你攰吖嘛！瞓多陣冇所謂。」
同事C：「反正都冇嘢做，瞓到降落都得。」

經歷人生中最趕嘅15分鐘

慶幸有一班好同事包容睡寶寶上身嘅我，但最後由我起身到降落，只係得十五分鐘。由換衫到梳洗，然後賣免稅品再準備客艙降落，相信呢十五分鐘係我人生過得最趕最摩打手嘅紀錄。
今次又係一個好教訓，瞓之前，真係要睇清楚個時間到底係邊個時區；我惟有安慰自己今個五月飛得太辛苦，原諒自己瞓過龍。