「明明搭飛機嗰陣見佢哋都只係派下餐行行企企咁，乜派餐都要考牌嘅咩？」
多功能空服員！6大職責逐個數
少年你太年輕喇！如果只係上嚟派下餐，咁唔提供餐飲服務嘅廉航，咪可以唔使搵服務員上飛機囉？其實平時冇事冇幹，空姐空少可能就只係派下餐，「Coffee or TEA？」下就可以收工。但係有起事上嚟，空姐空少都可以有好多唔同嘅職責，真係「身分角色隨時匯合你」嘅。
01 | 空中侍應
好多同事都唔太鍾意被人叫空中侍應，但無可否認，喺機艙入面斟茶遞水係我哋其中一項最常見，亦係最最最基本嘅工作，所以喺外人眼中，的確同侍應分別不大。「空中侍應」呢個稱謂，好概括咁描述咗我哋喺九成風平浪靜嘅航班上嘅工作內容。
02 | 杯麵外賣仔
由於呢個任務只限長途機上先至存在，加上一個長途班上，單係送杯麵嘅工作量足以媲美派一次餐（或者多於一次），所以我刻意要將呢項工作分開列明，以證其地位！每次喺飛機上面又長又窄嘅走廊上來回運送杯麵，我都覺得自己好似清仔，即係某大牌子公仔麵上面嗰隻公仔。
03 | 尋找失物專家
不時有乘客會同我哋講唔見咗嘢，然後我哋就要攞住支電筒喺機艙入面尋失物。係就係巡邏，但係我哋絕對唔係cosplay緊看更。
04 | 滅火專員
萬一喺飛機上不幸遇上火警，《衝上雲霄》就要即刻crossover埋《烈火雄心》。滅火筒可能有乘客都識用，不過飛機上啲滅火筒喺邊，乘客就未必會知道喇！
05 | 急救員
唔講你未必會知道，成日都會有人上咗機之後同我哋講佢哋唔舒服。當然唔係次次都真係咁病，但係航班上真係有人需要簡單急救嘅時候，空姐空少係絕對勝任有餘嘅！
06 | 逃生專家
以上種種都可能未必一定要空姐空少先做到，就算講緊急救呢類需要專業知識嘅活動，消防處都話任何人都可以幫手做心肺復甦啦！只有第六項係一定要空姐空少先能夠勝任，而呢個都係我哋呢份工作存在嘅原意。現今航空安全已經進步咗不少，大家都好放心外遊，搭飛機易過食生菜。
不過 touchwood有意外發生，飛機需要迫降嘅時候，幾時可以開門？點樣可以開門？邊道門開得？邊道門唔開得？假設漂流海上之後，點樣提升生存率等等，你絕對唔會搵到比空姐空少更加清楚呢啲問題嘅解決方法嘅人！
身兼多職 希望乘客可以諒解配合
當然仲有好多，例如洗廁所呀、推輪椅呀等各式各項瑣碎工作內容就唔詳細講喇！有人會話做空姐空少即係空中大打雜，咩都要做。咁樣講，某程度上都唔係錯嘅。既然知道空姐空少同時身兼多職，希望咁多位可以高抬貴手，體諒一下空服員工作上嘅難處。
記得有一次喺長途機上面派緊第二餐，有一個長者乘客感到呼吸困難，有兩位同事馬上去幫助嗰位乘客，霎時間少咗兩位同事派餐，整體派餐嘅所需時間自然會更長。
大部分乘客都眼見發生咗特殊狀況，均表示體諒。但係依然都會有少數苛刻嘅乘客，眼見附近不遠處有同事幫長者戴上氧氣面罩嘅同時，依然會責怪我哋派餐派得慢。
雖則急救同派餐同樣都係我哋嘅職責，我哋係絕對有責任要妥當完成，但係兩件事孰輕孰重，邊樣應該做先，邊樣應該做後，作為一個成年人，唔需要我哋特別解釋吧！不過好彩，面對咁無理嘅情況，有位正義嘅乘客出聲幫忙。
所以話，再多功能嘅空姐空少都需要有明白事理嘅乘客配合，先可以順利完成所有嘅工作！就此呼籲咁多位讀者繼續做個乖乖好乘客，共創美好航程～（跳起YEAH！）
