01 | 攞唔到機上blanket/pillow
Situation 1：如果你會因為機上冇晒呢兩樣嘢而發爛的話，麻煩你一係自己帶外套或者充氣枕頭，一係就投訴公司，咁先有可能解決問題。但唔好搵我哋crew出氣，鬧我地，講真冇Blanket關我L事咩，我都唔想㗎 ！
請你相信我，我用我啲面油發誓，我哋真係真係冇特登收埋啲毛氈枕頭唔畀你哋呀！冬天都叫好啲，至少人手一件外套，夏天先係災難！如果你有睇篇文，又準備去旅行，記得帶外套！
02 | 想食嗰個餐 派到你嗰陣冇晒
Situation 2：無晒Choice – 如果你會因為冇得選擇而發難，一係你一早自己上網預訂Special Meal，我哋公司有好多特別餐選擇㗎 ！一係你早啲Online check-in坐前啲，咁咪大機會有得選擇囉。不過提吓你：其實通常嗰兩三個choice都係好肥，同埋好難食的。同埋都係嗰句，嬲還嬲，投訴公司啦，關我L事咩。仲有，你唔會因為你個餐而搭CX掛？
呢個都唔係咩秘密，航空公司係唔會每個choice都上足 100%，而係有個rate，如果你真係唔食得牛肉之類，應該提前訂返特別餐。
03 | 無論架機幾搖擺 都要chur空姐畀熱飲
Situation 3：因為安全帶燈號亮著而冇得即刻飲熱水茶啡嘅客，麻煩你自己帶個熱水壺，叫我哋一早（seat belt light off ）斟定俾你，咁你咪唔使等囉？咁咪可以滿足到你突然想飲熱嘢嘅願望囉！
對唔住，呢個係安全問題，seat belt sign on 真係唔可以出熱飲，整親你或者其他乘客就唔好啦！而且，都係忍一陣啫！畀少少耐性同同理心，好不好？
04 | 前面個客拉後張椅 你迫到連枱都打唔開
Situation 4：如果因為前面個客reclined the seatback而覺得你嘅空間被侵佔，咁你就比多啲錢，揀第一行坐，咁你咪大把空間囉！如果前面個客唔肯拉返直椅背，我哋都冇計㗎，因為呢個係佢嘅權利，真係愛莫能助。
我明嗰種無奈！如果係我operate嘅時間，有吉位我會盡量調，full load嘅話，好彩前面個客明白事理，願意向前移，否則有時都愛莫能助！
05 | 自己位上行李櫃完全冇位放
Situation 5：如果因為你頭頂個行李櫃滿晒，而冇得將自己個大件行李放上去嘅話，咁麻煩你早啲上機，唔好買嘢買到last minute，因為係先到先得嘅。你咁遲先上嚟，剩返前面有位俾你放，咁你都唔應該怪人啦！
呢點我有少少保留，實情有時係啲客太多hand carry，有時就算好早上機，自己個位附近嘅行李櫃都滿滿哋！
06 | 我患上一種叫 唔飲得飛機水 的病
Situation 6：如果因為冇支裝水俾你，而你又話唔飲得飛機水，咁麻煩你買定支水上機吧！唔好少少錢都慳，我都好擔心你會渴死或者飲完飛機水會要我call Medlink！
好多人都知道飛機水好污糟多細菌，不過有時真係冇支裝水offer，都希望你可以體諒，大家係應該叫公司上多啲水畀客（同埋crew）！
07 | 坐第一行唔想放隨身物品上行李櫃
Situation 7：坐第一行而唔想將自己啲行李放上行李櫃嘅話，麻煩你坐第二行啦，第一行嘅所有袋都有放上去㗎 ！唔好再問點解啦， Safety Concern呀！
呢類客，大部分都有少少妄想症，覺得有人會對佢哋嘅物品不利，又或者佢哋個袋真係好貴重，死都攬住唔放！
08 | 以為自己畀咗錢就大晒
Situation 8：以為我哋係你工人，呼呼喝喝，或者發完脾氣，講完一大輪偉倫，但最後原來係搲嘢，其實當你咁做嘅時候，已經流露咗你嘅低賤嘅人格，成程機只會比crew當係茶餘飯後嘅話題，簡單啲嚟講，你以為自己高人一等，但係其實你好乞兒！
如果你嘅要求係合理，又或者係我能力內做到，而你態度又好，其實我相信，好多同事都好樂意幫手！重點是，有禮貌！！！
當然，如果你覺得你行為上冇不妥嘅可以照keep，我都冇咁大影響力話可以改變啲咩嘢，只係覺得大家搭飛機去旅行，都係想開開心心啫！無謂為咗小事勞氣啦～呢個純粹係個人感想！不喜勿插！
