港男：「我梗係坐呢班機，我做咩要畀你睇！」
不過呢，要知道點解我哋要睇你登機證呢？除了因為我哋要確保你真係坐呢班機，最大嘅concern都係安全，唔希望有啲唔係坐呢班機嘅人走咗上嚟，所以安全上嘅職責，我哋真係有絕對嘅權力去檢查，唔畀我哋睇，就會有以下嘅下場。
阿姐：「阿仔，幫我去問個客攞登機證，佢衝咗入嚟。」
我：「先生，麻煩出示返登機證吖，因為我哋要確保你係坐呢班機。」
香港男人：「我梗係坐呢班機，我做咩要畀你睇！」
我：「先生，呢個係安全條例所要求，麻煩你出示。」
拒絕出示登機證 機長有權請乘客離開飛機
當然佢一定堅持唔畀，要知道，只要一個人喺飛機故意妨礙我哋履行職務或者拒絕遵從安全嘅指引，我哋有權對佢發出警告，或者甚至將佢趕落機嘅。
我：「先生，我依家向你發出口頭通知，如果你堅持唔出示，我會通知機長請你離開飛機。」
用到呢個原因，佢死死地氣終於肯攞個登機證出嚟，但說時遲，那時快，原來已經有人通知咗機長，而來自香港嘅副機長已經企咗喺我後面。
「就係因為你一個人嘅自私，令我哋班機delay，我會通知公司，考慮對你追討班機delay帶嚟嘅損失。」
然後頭也不回，就走返入駕駛艙。
其實只係攞出嚟畀我哋睇一睇，點解為咗啖氣而搞到咁大鑊？如果我哋真係要佢離開飛機，佢張機票改簽嘅錢，係由佢自己負責，咁又冇面又要浪費錢，何必呢？
