無論中學到大專或大學，還是由學生走到社會做奴隸，從畢業至找到第1份工作前這個過渡期，都需要有個洗滌心靈嘅旅程去調劑一下。當輕鬆下又好、玩下又好，呢個旅行真係點都要去！
把握假期空檔 一同經歷「畢業旅行」
或者有人會用呢段時間返part-time、過下廢青生活等，但其實呢啲嘢往後都好多機會可以做，但相反一生人畢業就只有2、3次機會……尤其中學時期嘅友誼……就更加難忘深刻。
而呢份友誼亦係所謂「畢業旅行」嘅重點！就係同一班老友同學一齊去經歷呢個旅行，見證呢段歷史時刻！！
你試想想，雖然平時返學、出街都會一齊打波、唱K咁，但一齊搭飛機呢個活動相信機會都唔會多，甚至好多人都係中學先第1次（我就是成功的例子），嗰份回憶，其實一定加倍深刻。
如宿營齊過夜 瘋狂遊玩創造共同回憶
再者平時讀書返學都會有壓力，考試又測驗咁，玩都玩得冇咁盡興，就算你話真係星期六、日出嚟，但玩到幾夜都好啦，最後都係要各散東西、各自歸家。
但旅行正正就可以成班朋友好似去 camp 咁，共同進退，同生共死。一齊去發掘下香港以外嘅地方，瘋狂掃街食嘢、黐線成班自拍，玩到冇晒儀態，喺人哋國家留低唔少腳毛同嘈音。
無悔青春 永遠的美好回憶
雖然可能係窮遊，但當中一張又一張嘅相，並唔單止係個普通旅行咁簡單，而係感受緊呢段友誼，見證住一齊走過嘅日子。
他朝踏入社會，每個人都開始拼命做奴隸賣命……時間有限，假期又少，要做到大家都「隨時ready出發」嘅狀態，基本上已經冇乜可能。
呢種毫無負擔，咁多老友共聚嘅珍貴回憶，老套一句，就算以後有錢有時間都未必搵得番當年嘅感覺……
嗰種窮得嚟又熱血嘅旅行，偏偏就會係人生其中1個最深刻嘅旅程：）
PS： 無悔青春呀～就算窮遊都要一班人衝呀！！！！
熱豆腐仔
Ig： hottofuzai
fb： 熱豆腐仔
