撰文：C｜圖片來源：新傳媒資料室、LIHKG、Ig@valentin_khs、@kaman_kong
5個獨遊的理由
01｜做隻自由的小鳥
冇錯喇！一個人去旅行最大嘅好處就係自由自在。相信大家都試過同另一半、朋友，或者長輩去旅行，有時要夾另一個人嘅起居飲食，真係幾麻煩。所以獨遊優點，天生天養，完全唔使同人交代，一個字：爽！
02｜旅途上有艷遇
一個人去得旅行，多多少少都係冇乜感情牽掛。通常啲人見你一個人，都比較容易搵你傾下偈，或者夾埋一齊租車、食飯⋯⋯乜都好。如果可以喺異國留番一段甜蜜嘅回憶⋯⋯再唔係，當識多幾個朋友！嗯，都幾諗得過。
網民就分享咗唔少被搭訕嘅例子！
03｜遊歷冷門旅遊地
成日去日韓台，唔多唔少都有啲悶，但又唔係個個都想去啲「山卡啦」嘅地方喎！獨遊就幫到你喇！現在多了新航線，你想去南美又得，歐洲小國、第三世界國家又得，總之有假就飛啦！
04｜自主深度遊
自由自在嘅另一個好處，就係可以做啲hard-core嘢，而唔使遷就其他人。你想慢慢睇博物館，或者坐喺公園曬下太陽，或者好似上面咁講，同新相識嘅朋友傾耐啲偈，都冇人阻到你。
05｜一個人又有咩好怕喎
當你獨遊的經驗值上升，又或者你根本唔介意有冇人相伴，其實你就會發現，一個人同一班人都冇咩唔同。咁先係毒/獨遊嘅最高境界！
一個人去旅行有好處，就當然會有壞處啦！對於鍾意食嘢嘅朋友嚟講，最慘就係冇得叫晒餐牌入面所有嘢同朋友share，咁就的確有啲慘嘅！同埋唔係個個地方都安全，適合一個人自己去，又或者一日到黑冇人同自己講嘢係會有啲悶⋯⋯但獨遊嗰種樂趣，又真係一大班人去旅行畀唔到你。
