去旅行激嬲女朋友，好彩1張靚相救番我！有時另一半嘅行為真係會好影響自己嘅情緒，尤其是原本心情好好，但最後都被人搞到行雷閃電。
去日本旅行 乜都影一餐
而我，通常都係做雷神角色，搞到女朋友頭頂成日閃晒電……話說之前同女朋友去沖繩玩，因為嗰次係我哋第1次一齊旅行，所以都幾期待同興奮。
加上呢個地方我哋都係第1次去，好多人同事都好新鮮，真係格外興奮！！而我係個鍾意影相嘅人，去到日本真係乜鬼都影一餐。
影相激嬲女朋友 超大頭迫爆mon
除咗影風景、小動物，當然包括影到女朋友好多醜態，haha，同時正正因為我咁百厭同屎忽嘅性格，佢終於忍唔住嬲我了。
.
.
事緣是咁的。
去旅行好多人都想留低個倩影，就算女朋友本身唔係女神（已被打），但對方都仍然想影1張仙氣圖，叫做扮下偽女神咁。
「喂喂～呢個海景好正呀，幫我影呀～」
「好呀！」
如是者我隨手掏出1部單反相機，扮晒專業攝影師咁。
「影完嗱？俾我望下～」
啲人話如果幫對方影完相，但又唔俾佢睇，佢一定會周身唔自在，好似被蟻咬咁。而事實再次證明，呢樣嘢係真！
「哇！好靚呀！！女神呀！！」我一路講一路轉身自私睇。
「喂呀！快啲啦～」
冇錯，佢被沖繩啲蟻咬緊。
「好啦好啦，俾你睇啦！」
…………………..
「妖……食屎啦……」
我將佢個頭zoom到勁大，今次真係成個mon都係。
仲要，今次唔係第1次咁，最後佢嬲爆爆攞手機自拍。
難捱旅行冷戰 影靚相求補救
見到佢突然認真咗，我都知好似出咗事。難得一齊去旅行咁開心，無謂搞到咁……所以我決定認真幫佢影靚相補救！
整好啲相就偷偷哋WhatsApp俾佢。「喂~唔好嬲啦，送啲禮物俾你。」
叮～叮～～～
我見佢望住部電話又望下我，帶點疑惑咁，我諗佢都估唔到成個人喺隔籬都仲要WhatsApp……
「係咪影得好靚呢？Haha！」
「唔關你事！係……因為我靚囉～～」
但我望住佢從心底嘅微笑，就知道今次佢滿意～
之後仲post埋上Ig添……
所以話，當1個人影咗張靚相，真係會開心足成日，重要嘅係，佢已經忘記咗要嬲你，ha！
PS：標題應該改，幫女朋友影相的重要性，好似係……
